Japonııada jer silkinisinen keıin bes kıt jaǵaǵa shyǵyp qaldy

ASTANA. KAZINFORM – Japonııanyń Tateıama qalasynda bes kıt teńiz jaǵalaýyna shyǵyp qaldy, dep habarlaıdy Euronews.

Japondyq BAQ-tyń jazýynsha, jergilikti turǵyndar tiri qalǵan janýarlarǵa sý shashyp, olardy qutqarýǵa tyrysqan.

Mamandardyń túsindirýinshe, ashyq teńizdegi tsýnamıden kıtterge qaýip tónbeıdi. Alaıda tolqyndar jaǵalaýǵa jaqyndaǵan kezde sý kúrt sheginip, taıaz sýda ómir súretin kıtterdi ýaqytsha jaǵaǵa shyǵaryp tastaýy múmkin.

Euronews málimetinshe, kıtterdiń jaǵaǵa shyǵýy Kamchatka mańyndaǵy jer silkinisiniń tikeleı saldary ekeni ázirge naqty anyqtalmaǵan. Bul aýdanda kúshti tsýnamı bolmaǵan. Keıbir derekkózder kıtterdiń jaǵalaýǵa shyǵýyn buǵan deıingi taıfýnmen baılanystyrýy múmkin ekenin aıtady.

AQSh Geologııalyq qyzmetiniń dereginshe, 30 shildede Kamchatka túbeginde magnıtýdasy 8,8 bolatyn jer silkinisi tirkelgen. Jerasty dúmpýiniń oshaǵy shamamen 19 shaqyrym tereńdikte ornalasqan.

Eske sala keteıik, osy zilzaladan keıin birqatar elde tsýnamıge baılanysty eskertý jarııalanǵan bolatyn. Japonııada bıiktigi 50 santımetrge jetetin tsýnamı tolqyny tirkeldi.