Japonııada jer silkinisinen qaza tapqandar sany 168-ge jetti

Japonııada 1 qańtardan beri jalǵasyp kele jatqan jer silkinisinen qaza tapqandar sany 168-ge jetti. Buǵan Japonııanyń aımaqtyq bıligi jarııalaǵan málimetteri dálel, dep habarlaıdy Kazinform reseılik TASS agenttigine silteme jasap.

Sonymen qatar, qutqarýshylar ornalasqan jerin anyqtaý úshin baılanysqa shyǵa almaı otyrǵan turǵyndardyń sany 323-ke jetti. Áli de bolyp jatqan jerasty dúmpýleriniń saldarynan 560-tan astam adam ártúrli dárejede jaraqat alǵan.

Jer silkinisinen ásirese Isıkava prefektýrasy zardap shekti. Onda keminde 1370 úı tolyǵymen nemese ishinara qırady, órt saldarynan 300-ge jýyq ǵımarat búlindi. Zardap shekken aımaqta elektr jáne sý berý júıeleri buzylyp, janarmaı tapshylyǵy sezilýde.

Apat aımaǵynda Japonııa qutqarý kúshteriniń izdeý-qutqarý operatsııasy jalǵasyp jatyr. Qutqarýshylar sońǵy ret 6 qańtarda úıindi astynan bir adamdy aman alyp shyqty. 90 jastaǵy jergilikti turǵyn bes kúnnen artyq jerasty dúmpýinen qıraǵan úıiniń astynda bolǵan.

Osyǵan deıin Japonııadaǵy jer silkinisinen qaza tapqandar sany 128-ge jetip, 200-den astam adamnyń iz-túzsiz joǵalyp ketkenin jazǵan bolatynbyz.