Japonııada jer silkinisinen zardap shekkenderdiń sany 21-ge jetti
ASTANA. QazAqparat - Japonııanyń batysynda qatty jer silkinip, zardap shekkender sany 21 adamǵa ulǵaıdy, dep habarlaıdy QazAqparat Rıa Novostı agenttigine silteme jasap.
Japondyq Tottorı prefektýrasynda 6,6 magnıtýdaly jer silkinisi boldy. Oshaǵy 10 shaqyrym tereńdikte. Dúmpý kúshi - 6 ball.
Kýágerlerdiń habarlaýynsha, dúmpýlerdiń kúshti bolǵany sonshalyq aıaqta turý qıyn boldy. Jer asty dúmpýi 47 prefektýranyń 31-inde sezildi. Jer silkinisinen keıin aftershokty dúmpýler jalǵasýda, onyń birinde magnıtýda 5,0-ge jetti.
NHK telearnasynyń derekterine sáıkes, qazir óńirde 3,5-ten astam magnıtýdamen 34 qaıtalanǵan jer silkinisi tirkeldi. Meteorologtar aftershok áli bir apta saqtalady dep eskertýde.
Evakýatsııa beketterinde 2 myń 850 adam bar. Budan buryn prefektýra ǵımarattaryna keltirilgen shyǵyn týraly habarlama kelip túsken.
