Japonııada jer silkinisinen keıin 70 myń adam týǵan jerine bara almaı otyr
ASTANA. QazAqparat - Japonııa halqy jeksenbide 2011 jyly bolǵan jer silkinisi qurbandaryn eske aldy. Eldiń premer-mınıstri Sındzo Abe eske alý rásiminde 70 myńnan astam adamnyń zilzaladan keıin turǵylyqty jerlerine bara almaı otyrǵanyn málim etti, dep habarlaıdy Sınhýa.
Óz sózinde Sındzo Abe úkimet Fýkýsıma prefektýrasyndaǵy asa qatty zardap shekken aýdandardaǵy qaıta qalpyna keltirý jumystaryn jedeldetip jatqandyǵyn aıtty.
Onyń sózine qaraǵanda, prefektýra aýmaqtaǵy evakýatsııa jaıly eskertýlerdi birtindep azaıtyp otyr. Degenmen premer-mınıstr "Fýkýsıma-1" AES zardaptaryn joıýdyń nátıjeleri týraly esh nárse aıtpady.
Japonııa BAQ-tarynyń derekterine qaraǵanda, Fýkýsıma prefektýrasy aýdandarynyń basym bóliginde apat aımaǵynan halyqty kóshirý boıynsha eskertý alynyp tastalǵanymen zardap shekkenderdiń tek 15 protsenti ǵana óz qalalaryna oralǵan.
Eske sala ketsek, 2011 jyly kúshi 9,0 ball jer silkinisi bolyp, artynsha týyndaǵan tsýnamıdiń saldarynan 16 myń adam qaza tapty, 2539 adam iz-túzsiz joǵaldy. Jer silkinisi men tsýnamı saldarynan "Fýkýsıma-1" AES-ten kóp mólsherde radıoaktıvti zattar taralyp, Chernobyldan keıingi ıadrolyq apatqa ushyratqan bolatyn.
