Japonııada jer silkinisi boldy - zardap shekkender bar
ASTANA. 13 sáýir. QazAqparat - Japonııalyq Honsıý aralynyń ońtústik-batysynda 6 baldyq jer silkinisi tirkeldi. Bul týraly RBK habarlap otyr.
Jer asty dúmpýleri búgin jergilikti ýaqyt boıynsha 5:30-da oryn alǵan.
Jer silkinisiniń oshaǵy Sýmoto qalasynan soltústik-batysta 9 shaqyrymda, Fýkýra qalasynan ońtústik-shyǵysta 20 shaqyrymda ornalasqan. Jer asty dúmpýleri Іshki Japon teńizindegi Avadzı aralynyń mańynda 14 shaqyrym tereńdikte tirkeldi.
Jer silkinisi saldarynan Hego, Osaka, Fýkýı, Tokýsıma prefektýralarynda 19 adam zardap shekti. Olardyń barlyǵy egde jastaǵy adamdar.
Japon úkimetine janynan daǵdarys shtaby qurylǵan. Bılik ókilderi ǵımarattardyń búliný deńgeıin anyqtap, zardap shekkenderge qol ushyn sozýdy tapsyrdy.
«Ázirge eleýli zaqym týraly málimet túsken joq. Atomdyq stantsııalar zardap shekpegen», - dep málimdedi japondyq úkimettiń bas hatshysy.
Aıta ketken abzal, Japonııanyń atalmysh aımaǵynda 2011 jyly naýryzda 9 baldyq jer silkinisi tirkelgen edi. Onyń saldarynan eldiń jaǵalaýyna tsýnamı tap berip, 20 myńǵa jýyq adam zardap shekti. Tabıǵı apat saldarynan «Fýkýsıma-1» atomdyq elektr stansasynda birneshe jarylys oryn alyp, radıatsııa aýaǵa taralyp ketken bolatyn.
