Japonııada jazǵy festıvalder men dástúrli merekeler maýsymy qyza tústi
ASTANA. KAZINFORM - Japonııada shilde men tamyz aılary dástúrli jazǵy sharalarǵa toly kezeń sanalady. Aptap ystyqqa baılanysty kóptegen merekelik is-shara keshki ýaqytta ótedi. Bul kezde kóshelerge festıvalge qatysýshylar jınalyp, bı bılep, sherýge shyǵady.
Qala kóshelerinde shamdar jaǵylyp, otshashýlar atylady. Otbasylar ata-babalaryn eske alýǵa arnalǵan dástúrli rásimderge qatysady, dep habarlaıdy Jiji Press.
Japonııadaǵy jazǵy merekelerdiń basty erekshelikteriniń biri – matsýrı festıvalderi. Olar turǵyndardy, otbasy músheleri men dostardy ortaq merekege jınaıdy.
Jaz aılarynda Kıoto men Osakada Gıon-matsýrı jáne Tendzın-matsýrı festıvalderi ótedi. Bul kúnderi qalanyń kóshelerimen áshekeılengen alyp platformalar baıaý qozǵalady. Ózenge júzdegen sham jaǵylǵan qaıyq shyǵady. Merekelik shara otshashýmen aıaqtalady.
Jazda Japonııanyń kóptegen óńirinde Tanabata juldyzdar merekesi atap ótiledi. Keıbir aımaqtarda bul mereke 7 tamyzda ótkiziledi.
Mereke kezinde japondar úıler men kóshelerdi bambýk butaqtarymen bezendiredi. Olarǵa túrli tústi qaǵaz jolaqtaryna jazylǵan tilekter ilinedi.
Tanabata Orıhıme men Hıkobosı týraly ańyzben baılanysty. Ańyz boıynsha, bir-birine ǵashyq bolǵan olar Qus jolynyń eki jaǵynda turady jáne jylyna bir ret qana kezdesýge múmkindik alady.
Japondar úshin O-Bon merekesiniń de mańyzy zor. Bul – ata-babalardy eske alý kezeńi. Kóptegen óńirde O-Bon tamyzdyń ortasynda atap ótiledi.
Osy kúnderi otbasylar týǵan jerlerine oralady. Olar týystarynyń qabirine baryp, hosh ıisti taıaqshalar jaǵady jáne qurbandyq retinde túrli taǵamdar qoıady.
Japon dástúrinde O-Bon kezinde ata-babalardyń rýhtary tiriler álemine oralady degen túsinik bar. Mereke aıaqtalǵan soń olar óz álemine qaıta oralýy kerek dep esepteledi.
O-Bonmen baılanysty bon-odorı bıi de shilde jáne tamyz aılarynda Japonııanyń kóptegen qalalary men aýyldarynda ótedi.
Qatysýshylar sheńber quryp, mýzyka yrǵaǵymen qarapaıym qımyldar jasaıdy. Osylaısha olar ata-babalardy eske alýǵa arnalǵan ortaq dástúrge qatysady.
Japonııadaǵy jazǵy mádenı sharalardyń qatarynda Fuji Rock Festival festıvali de bar. Eldegi eń iri ashyq aspan astyndaǵy mýzykalyq festıvalderdiń biri Nııgata prefektýrasynyń taýlarynda jyl saıyn ótedi.
Festıvalge Japonııadan jáne shetelden 200-den astam ónerpaz qatysady.
Osyǵan deıin Japonııada qabyǵy sýda erıtin ekologııalyq taza otshashý ázirlengeni týraly jazdyq.
