Japonııada jańa Úkimet quryldy
ASTANA. 2 qyrkúıek. QazAqparat - Japonııanyń jańa premer-mınıstri Iosıhıko Noda jańa Úkimet qurýdy aıaqtady.
Euronews habarlaǵandaı, SІM basshysy 47 jastaǵy Koıtıro Gemba boldy. Buǵan deıin ol Ulttyq strategııalar mınıstri qyzmetin atqardy jáne dıplomatııalyq tájirıbesi bolǵan joq. Budan buryn jańa Premer atqarǵan Qarjy mınıstri qyzmeti parlamenttiń aty shyǵa qoımaǵan depýtaty Dzıýn Adzýmıge buıyrdy, ol úkimettiń quramyna alǵash ret enip otyr.
Sarapshylar Premer-mınıstr Noda qarjy máselelerine ózi basshylyq etedi degen boljam jasaýda. Noda bıýdjet shyǵyndaryn qatań qysqartyp, salyqtardy kóbeıtýdi jaqtaıtyndardyń qatarynda.
Iosıhıko Noda jańa mınıstrler kabınetiniń basty mindeti - taıaýdaǵy tabıǵı apattan jáne qarjy reformasynan keıingi eldi qalpyna keltirý.
