Japonııada jańa partııanyń jetekshisi jasandy ıntellekt bolady
ASTANA. KAZINFORM — Japonııada qurylǵan jańa saıası partııanyń jetekshisi retinde jasandy ıntellekt taǵaıyndalmaq. Mundaı sheshim partııanyń negizin qalaýshy saılaýdaǵy sátsizdikten keıin otstavkaǵa ketken soń qabyldandy, dep habarlaıdy The Japan Times.
«Qaıta túleý joly» partııasyn 2024 jyly Tokıo gýbernatory saılaýynda onlaın-kampanııasynyń arqasynda kútpegen jerden ekinshi oryn alǵan, Batys Japonııadaǵy shaǵyn qalanyń burynǵy meri Sındzıro Isıgamarý 2025 jyldyń qańtarynda qurǵan bolatyn.
Alaıda partııa joǵarǵy palata saılaýynda birde-bir oryn ıelene almaı, Isıgamarý jetekshilik qyzmetinen bas tartty.
«Jańa jetekshi jasandy ıntellekt bolady», - dedi partııanyń jańa jetekshisi ári JI júıesiniń «kómekshisi» retinde ózin tanystyrǵan aspırant Kokı Okýmýra.
Onyń aıtýynsha, jasandy ıntellekt partııa músheleriniń saıası sheshimderine aralaspaıdy, tek resýrstardy bólý sııaqty uıymdastyrýshylyq mindetterdi atqarady. Okýmýra jýyrda Isıgamarýdyń ornyna ótken ishki saılaýda jeńiske jetken.
Soǵan qaramastan, «Qaıta túleý joly» partııasy ázirge aıtarlyqtaı jetistikke jete qoıǵan joq. Maýsym aıynda Tokıo assambleıasyna úmitker bolǵan 42 múshesi, sondaı-aq shildede joǵarǵy palataǵa kandıdat retinde usynylǵan 10 múshesi de saılaýda jeńilis tapty.
Aıta keteıik, buǵan deıin tuńǵysh jasandy ıntellekt-mınıstr Albanııada taǵaıyndalǵany habarlanǵan edi.