Japonııada jańa dáýir bastaldy: Narýhıto hanzada taqqa otyrdy
NUR-SULTAN. QazAqparat - Japonııa úkimeti 2019 jyldyń 1 mamyrynda jańa ımperııalyq kezeńniń bastalǵanyn jarııalady. Bul kezeń «Reıv» dáýiri dep atalady - bul ataý qazaq tilinde aýdarǵanda «tártip», «úılesim» jáne «gúldengen álem» degen maǵyna beredi, dep habarlaıdy QazAqparat VVS silteme jasap.
Qazirgi «Heıseı» dep atalatyn dáýirdiń ataýy qytaı ádebıetinen alynǵan bolatyn, ol «álem jetistigi» degen maǵyna beredi. Ol dáýir 1989 jyldyń qańtarynda, Hırohıto ımperator qaıtys bolǵan kezde bastalǵan edi. Onyń uly Akıhıto Japonııanyń 125-shi ımperatory retinde 30 jylǵa jýyq ýaqyt bılik qurdy. Sóıtip óz erkimen taqtan bas tartty. Ol bul sheshimin jasynyń ulǵaıǵanymen túsindirdi.
Hanzada Narýhıto taqqa búgin, ıaǵnı 1 mamyr kúni otyrdy.
Japonııa mınıstrler kabınetiniń bas hatshysy Esıhıde Sýga baspasóz máslıhatynda jańa dáýir úshin tańdap alynǵan ataý jazylǵan taqtaıshany kórsetti.
Japonııanyń qazirgi tarıhynda 4 dáýir ǵana bolǵan. «Álem jetistigi» zamanyna deıingi Hırohıto ımperatordyń dáýiri óte uzaqqa sozyldy - ol memleketti 1926-1989 jyldar aralyǵynda bıledi. Ol kezeńge mıllıtarıstik Japonııa, Ekinshi dúnıejúzilik soǵys kiredi. Tarıhtan belgili, bul ýaqytta kúnshyǵys eli natsıstik Germanııamen jáne fashıstik Italııamen odaqtasqan bolatyn. Sondaı-aq, Hırosıma men Nagasakıge ıadrolyq bomba tastaldy. Soǵystan keıingi jańa memlekettiń qurylýy, tehnologııalyq jáne ekonomıkalyq órkendeý - osynyń bári «Seva» («jaryq álem») dáýirinde oryn aldy.
Onyń aldynda 1912-1926 jyldar aralyǵynda Japonııada «Taıse» («uly týralyq») dáýiri saltanat qurdy. Al 1868 jyldan 1912 jylǵa deıin Mýtsýhıto ımperatordyń tusynda Japonııa «meıdzı» («bilimdi basqarý») dáýirin bastan keshirdi.
