Japonııada zamanaýı kitaphana úlgisine uqsaıtyn aıryqsha qabirstan ashyldy (FOTO)
ASTANA. QazAqparat - Japonııada ómir súrýge ǵana emes, jerleýge de jer jetispeıdi. Tokıo ortalyǵyndaǵy beıitterde bir qabirdiń orny óte qymbat - 100 000 dollardan asyp ketedi. Japondar marqumdardyń kúli salynǵan qumyralardy jiktelgen sórelerge qoıyp, ony jetildirilgen júıe negizinde kelýshilerge jedel usynatyn sońǵy tehnrologııalyq úlgidegi shaǵyn oryndar ashyp tyǵyryqtan shyǵýdy jolyn tapty. Osyndaı ǵajaıyp qabirstan jaıynda Motherboard basylymynyń Cool Japan blogy jazady.
Rurikoin qabirstanynyń ǵımaraty kópqabatty kólik turaǵyna uqsaıdy. Onda marqumnyń kúli salynǵan qumyralar sórelerge qoıylǵan. Ony salýǵa Toyota korporatsııanyń ózi atsalysypty. Biraq tehnologııasy qupııa ári qabirstannyń ishin sýretke túsirýge tyıym salynǵan. Rurikoin ishi kádimgi kitaphana jumysyn qaıtalaıdy. Oǵan kelýshiniń árqaısysynyń jeke ruqsat kartasy bolady, sol arqyly ol óziniń marqum týystarynyń kúli salynǵan qumyrany kóre alady.
Ruriden kolýmbarıi (órtelgen adamnyń kúli salynǵan ýrnalar qoımasy) Tokıoda ornalasqan. Bul jerde atalǵan tehnologııany qoldanady. Shaǵyn ǵımarattyń ishinde 2 046 áınekten jasalǵan Býddanyń músinshesi bar. Olar biryńǵaı kók tústi jaryqpen árlengen. Onyń árqaısysy belgili bir adamǵa bekitilgen. Marqumnyń týysy kolýmbarııge kelip, kartochkasy kómegimen ruqsat alǵan soń qajetti qumyraǵa basqalarynan ózgeshe tústi jaryq beriledi.
Ruriden qabirstanynda bir orynnyń jyldyq aqysy shamamen 80 dollar, bul Tokıo shetindegi zırattardaǵy orynnan eki esege arzan. Ruriden-de adamnyń kúli 33 jyl saqtalady, odan keıin ony jerge kómedi.
Eske sala ketsek, japon qoǵamy qartaıyp ketken, turǵyndardyń tórtten biri 65 jastan úlken adamdar. Ólgenderdiń qabirin kútip ustaý qymbatqa túskenniń ózinde de onyń izdeýshisi joq. Ruriden men Rurikoin qabirstany osy máseleniń tolyq sheshimi emes.
Qazir Rurikoin jobasyna Gonkong, Sıngapýr jáne Qytaı qyzyǵýshylyq tanytyp otyr. Alaıda Rurikoin jobasyn ázirleýshiler ózderiniń aıryqsha zamanaýı qabirstanyn basqalardyń kóshirýine qarsy, ári óz tehnologısyn qupııa ustaýda.
