Japonııada ıadrolyq qarýdy ákelýge tyıym salý máselesi talqylanyp jatyr
ASTANA. KAZINFORM – Japonııada ıadrolyq qarýdy elge ákelýge qoıylǵan tyıymdy qaıta qaraý múmkindigi qoǵamdyq deńgeıde talqylana bastady. Bul týraly Kyodo News agenttigi.
Qorǵanys mınıstri Sındzıro Koıdzýmıdiń aıtýynsha, Eýropanyń birqatar elderi ıadrolyq tejeý áleýetin kúsheıtýge umtylyp jatqandyqtan, Japonııa da ıadrolyq qarý máselesin qoǵamdyq deńgeıde talqylaýy qajet.
Mınıstrdiń sózinshe, Japonııa bul taqyrypty talqylaýdan tys qala almaıdy. Ol bul málimdemeni ınternet-baǵdarlamada jasap, jyldyń sońyna deıin úkimet qaıta qaraıtyn ulttyq qaýipsizdik salasyndaǵy úsh negizgi qujatty meńzegen.
Koıdzýmı mysal retinde Frantsııa men Fınlıandııany keltirdi. Onyń aıtýynsha, bul elder ıadrolyq tejeý saıasatyn kúsheıtýge baǵyttalǵan qadamdar jasap jatyr.
Maýsym aıynda Fınlıandııa parlamenti el aýmaǵyna ıadrolyq qarý ákelýge múmkindik beretin zań qabyldady. Al Frantsııa prezıdenti Emmanıýel Makron naýryz aıynda eldiń ıadrolyq oqtumsyqtar sanyn arttyratynyn málimdegen bolatyn.
Japonııa AQSh-tyń «ıadrolyq qolshatyrynyń» qorǵaýynda bolǵanymen, ıadrolyq shabýylǵa ushyraǵan jalǵyz memleket retinde úsh ıadrolyq emes qaǵıdatty ustanyp keledi. Olar – ıadrolyq qarýdy óndirmeý, ıelenbeý jáne el aýmaǵyna ornalastyrmaý.
Koıdzýmı Japonııa tóńiregindegi qaýipsizdik jaǵdaıy aıtarlyqtaı kúrdelengenin aıtyp, keıbir máselelerdi talqylaýǵa bolmaıdy degen kózqarastan bas tartý qajet ekenin jetkizdi.
Ótken jyldyń jeltoqsanynda premer-mınıstr Sanae Takaıtı úkimetiniń qaýipsizdik saıasatyn ázirleýge qatysqan derekkóz Japonııanyń ıadrolyq qarýǵa ıe bolýy kerek degen pikir bildirgen. Bul málimdeme oppozıtsııalyq partııalar men birqatar shet memleketterdiń synyna ushyrady.
Buǵan deıin eldiń burynǵy qorǵanys mınıstri Itsýnorı Onodera da Japonııanyń ıadrolyq emes qaǵıdattarynyń bolashaǵyn talqylaý qajet ekenin málimdegen bolatyn.
Aıta keteıik, MAGATE Irannan shuǵyl túrde ıadrolyq nysandarǵa qoljetimdilikti talap etkenin jazǵanbyz.
