Japonııada voleıboldan Azııa chempıondar lıgasynyń oıyndary bastaldy

ASTANA. KAZINFORM — Japonııanyń Hırakata jáne Kıoto qalalarynda 11-18 mamyr aralyǵynda voleıboldan erler komandalary arasynda ótetin Azııa chempıondar lıgasynda Qazaqstannan «Aqtóbe» klýby baq synaıdy.

Qazaqstan voleıbol federatsııasynan málim etkenindeı, osyǵan deıin Azııa klýbtyq chempıonaty atalyp kelgen, búgin bastalǵan jarysta aqtóbelikter alǵash ret óner kórsetedi.
«Aqtóbe» komandasy ótken maýsymda Qazaqstan kýbogy men sýperkýbokty jeńip alyp, el chempıonatynda kúmis júldeger atanǵan edi.

Sergeı Trıkozdyń shákirtteri A tobynda bastapqy kezdesýin erteń aýstralııalyq «Queensland Pirates» klýbymen ótkizedi. Al 13 mamyrda 2023 jylǵy Azııa klýbtyq chempıonatynyń jeńimpazy, japonııalyq «Suntory Sunbirds Osaka» komandasymen synǵa túsedi.

Qazaqstandyq komandalar buǵan deıin Azııa klýbtyq chempıonatynda 1999 jylǵy alǵashqy dodaǵa ǵana qatyspaǵan edi. 2005 jyly almatylyq «Rahat-TsSKA» jeńimpaz atandy. Sondaı-aq qazaqstandyq klýbtar tórt ret kúmis, úsh márte qola aldy. 

Eske sala keteıik, budan buryn «Jetisý» klýbynyń alǵash ret Azııa chempıondar lıgasynyń jeńimpazy atanǵanyn jazǵan edik.