Japonııada uzaq jasaǵandardyń 90 paıyzy - áıelder
ASTANA. QazAqparat - Búgin Japonııada ulttyq mereke - Aǵa urpaqqa qurmet kórsetý kúni. Osy merekege oraı el óziniń uzaq ǵumyr keshken qarııalaryna qoshemet kórsetedi jáne qyzyqty statıstıkasyn jparııalaıdy, dep habarlady moya-planeta.ru.
El halqynyń 25,9 paıyzy nemese 33 mln.-ǵa jýyq adam - 65 jastan asqan qarııalar. Japonııanyń árbir segizinshi turǵyny 75 jastan asqan: bul halyqtyń 12,5 paıyzy nemese 15,9 mln. adam. Bul kórsetkish 1950 jyldan beri júrgizilip kele jatqan statıstıka tarıhyndaǵy rekordtyq kórsetkish. Eń qyzyǵy - jasy 100-den asqan adamdar 1963 jyly nebári 153 adam bolsa, qazir olardyń qatary 58 820 adamǵa jetken. Ár jyl saıyn uzaq ómir súretin adamdar sany 3000-4000 adamǵa kóbeıip otyr.
Ómir uzaqtyǵy da ósip keledi. Bıylǵy jyly Japonııada erlerdiń ómir súrýiniń ortasha uzaqtyǵy 80 jastan asyp, 80,21 jylǵa jetse, áıelder jasynyń uzaqtyǵy 0,2 jylǵa artyp, 86,61 jasty qurady. Jer ústindegi eń qart adamdar da japondyqtar: olar - 111 jastaǵy Sakarı Momoı jáne 116 jastaǵy Mısao Okava, olardyń esimderi Gınnestiń rekordtar kitabyna engen.
Densaýlyq saqtaý, eńbek qorǵaý jáne áleýmettik qamsyzdandyrý mınıstrligi usynǵan málimetter boıynsha, eldegi uzaq jasaýshylardyń basym bóligi - áıelder. Olar ǵasyrdan uzaq jasaǵandar arasynda 90 paıyzdy quraıdy. Japonııa keıýanalar eli dep aıtýǵa bolady, al balalar óte az: halyqtyń 13 paıyzy ǵana 15 jasqa deıingiler.
Japondyqtardyń ómir jasynyń únemi ósip otyrýyn mınıstrlik sheneýnikteri medıtsına damýynyń joǵary deńgeıimen jáne qart adamdarǵa jasalyp otyrǵan jaqsy turmys jaǵdaılarymen baılanystyrady.
