Japonııada ulttyq valıýtaǵa baılanǵan alǵashqy steıblkoın shyǵarylmaq

ASTANA. KAZINFORM — Japonııanyń Qarjylyq qyzmetter agenttigi osy kúzde eldegi alǵashqy ulttyq valıýtaǵa tolyq baılanǵan steıblkoındi shyǵarýǵa ruqsat bermek, dep habarlaıdy  jergilikti BAQ.

Tsıfrlyq aktıvti Tokıonyń JPYC atty fınteh-kompanııasy shyǵarady. Ol aqsha aýdarý operatory retinde tirkelip, ıenaǵa baılanǵan steıblkoındi naryqqa usynbaq.

Kompanııa aldaǵy úsh jylda naryqqa 7 mıllıard AQSh dollaryna deıingi kólemde token shyǵarýdy josparlap otyr. Jańa qarjy quraly Japonııada kúndelikti tólemdermen qatar halyqaralyq aqsha aýdarymdary úshin de tıimdi qural bolady dep kútilip otyr.

Mundaı aktıvterge degen qyzyǵýshylyq jahandyq úrdistermen baılanysty. Búgingi tańda álemdik steıblkoın naryǵynyń kólemi 250 mıllıard dollardan asyp otyr. Onyń basym bóligi AQSh dollaryna baılanǵan. Eń iri emıtentter — Tether jáne Circle — búginde AQSh qazynashylyq oblıgatsııalarynyń iri satyp alýshylaryna aınalǵan.

JPYC kompanııasynyń bas dırektory Norıtakı Okabeniń aıtýynsha, steıblkoınder — «memlekettik oblıgatsııalardy sińiretin alyp mehanızm».

Ol bolashaqta JPYC Japonııada dál osyndaı ról atqaryp, memlekettik oblıgatsııalardy belsendi túrde satyp alatynyn atap ótti.

Bul suranys qaryz naryǵyn turaqtandyryp, paıyzdyq mólsherlemelerdiń shekten tys ósýine jol bermeýge yqpal etedi.

Buǵan deıin Ulttyq bank «steıblkoın» degen ataýmen óz tsıfrlyq aktıvin shyǵarýdy josparlap otyrǵanyn jazǵanbyz.