Japonııada Úkimet quramy jańartylady
ASTANA. KAZINFORM – Japonııa premer-mınıstri Sanae Takaıchı osy aıdyń sońynda Úkimet pen bıleýshi Lıberaldyq-demokratııalyq partııa basshylyǵynda kadrlyq ózgerister júrgizýdi josparlap otyr, dep habarlaıdy Kyodo.
Úkimettegi derekkózderdiń málimetinshe, qorǵanys mınıstri Sındzıro Koıdzýmı qyzmetinde qalýy múmkin. Takaıchı jyl sońyna deıin eldiń qaýipsizdik salasyndaǵy úsh negizgi qujatyn qaıta qaraý josparlanǵandyqtan, osy baǵyttaǵy saıasattyń sabaqtastyǵyn saqtaýǵa múddeli.
45 jastaǵy Koıdzýmı – burynǵy premer-mınıstr Dzıýnıtıro Koıdzýmıdiń uly. Ol LDP tóraǵasy saılaýyna eki ret qatysyp, 2025 jylǵy qazanda Takaıchıden jeńilgen. Soǵan qaramastan, saıasatker qoǵam arasynda tanymal jáne bolashaq premer-mınıstr bolýy yqtımal tulǵalardyń biri sanalady.
Syrtqy ister mınıstri Tosımıtsý Motegı de qyzmetinde qalady dep kútilip otyr. Úkimet ókilderi qaýipsizdik qujattaryn qaıta qaraý kezinde syrtqy saıasat pen qorǵanys salasyndaǵy sabaqtastyq mańyzdy ekenin atap ótti.
Sonymen qatar Takaıchı LDP-nyń saıası keńesiniń tóraǵasy, burynǵy ekonomıkalyq qaýipsizdik mınıstri Takaıýkı Kobaıasıge Úkimettegi mańyzdy qyzmetterdiń birin usynýy múmkin. Onyń kandıdatýrasy ekonomıkany jandandyrý nemese ónerkásip mınıstri laýazymyna qarastyrylyp jatyr.
Derekkózderdiń aıtýynsha, aldaǵy kadrlyq ózgerister kezinde qarjy mınıstri Satsýkı Kataıama da qyzmetinde qalýy yqtımal.
Sarapshylar Takaıchı Úkimettegi negizgi qyzmetterge yqtımal saıası qarsylastaryn tartý arqyly óz ákimshiliginiń pozıtsııasyn nyǵaıtýdy kózdeýi múmkin ekenin aıtady.
Aıta keteıik, buǵan deıin Japonııa armııasynyń qaıta qurylatynyn jazyp edik.
