Japonııada «Twitter-degi kisi óltirýshi» ólim jazasyna kesildi

ASTANA. KAZINFORM — Japonııada juma kúni áleýmettik jeli arqyly baılanys ornatyp, toǵyz adamdy óltirgen er adam ólim jazasyna kesilip, úkim oryndaldy, dep habarlaıdy AZERTADJ.

Reuters agenttigi bul Japonııada sońǵy úsh jylda alǵash ret oryndalǵan ólim jazasy ekenin habarlady.

Takahıro Sıraısı 2017 jyly Tokıo mańyndaǵy Kanagava prefektýrasyndaǵy Dzama qalasyndaǵy páterinde segiz áıel men bir er adamdy tunshyqtyryp óltirip, denelerin bólshektep tastaǵany úshin ólim jazasyna kesilgen edi. Ol qurbandarymen áleýmettik jeli arqyly baılanysqandyqtan, ony «Twitter-kisi óltirýshi» dep atap ketken.

Japonııanyń ádilet mınıstri Keısýke Sýdzýkı Sıraısıdiń darǵa asylýyna ruqsat berip, bul qylmystardyń qoǵamda «úlken dúrbeleń men shok» týǵyzǵanyn aıtty.

Bul — 2022 jylǵy shildede Akıhabarada jappaı kisi óltirgen qylmyskerge qatysty úkim oryndalǵannan bergi alǵashqy ólim jazasy.

Sondaı-aq bul — premer-mınıstr Sıgerý Isıbanyń ótken jyldyń qazan aıynda úkimet basyna kelgeninen keıin alǵash ret ólim jazasynyń oryndalýy.

— Mundaı qatygez qylmystar jalǵasyp jatqan kezde ólim jazasyn joıýǵa bolmaıdy, — dedi mınıstr Sýdzýkı baspasóz máslıhatynda.

Onyń aıtýynsha, qazirgi tańda Japonııada ólim jazasyna kesilgen 105 tutqyn bar.

Budan buryn Vetnam birqatar qylmys úshin ólim jazasyn alyp tastaıtyny habarlandy.