Japonııada týý kórsetkishi onynshy jyl qatarynan rekordtyq mınımýmǵa deıin tómendedi
ASTANA. KAZINFORM — 2025 jyly Japonııada dúnıege kelgen balalar sany 706 myńǵa deıin azaıdy. Bul — 1899 jyldan beri statıstıka júrgizile bastaǵaly tirkelgen eń tómengi kórsetkish jáne qatarynan onynshy jyl jańarǵan antırekord. Bul týraly eldiń Densaýlyq saqtaý mınıstrligi málimdedi, dep habarlaıdy Kyodo News.
2024 jylmen salystyrǵanda kórsetkish 2,1%-ǵa tómendegen. Sarapshylar muny halyqtyń jedel qartaıýymen jáne ınflıatsııamen, turmystyq qymbatshylyqtyń bala tárbıeleýdi qıyndata túsýimen baılanystyrady. Kóptegen japondyq neke men bala súıýdi keıinge qaldyryp nemese otbasynan múlde bas tartyp, ómirlik basymdyqtaryn ózgertip jatyr.
Tabıǵı ósimniń kerisinshe qubylysy, ıaǵnı ólim sany týý sanynan asyp túsýi rekordtyq 899 myń adamǵa jetti. Buǵan deıin týý kórsetkishi 710 myńnan tómen deńgeıge tek 2042 jylǵa qaraı túsedi dep boljanǵan edi.
2024 jyly japon azamattary arasynda týý kórsetkishi alǵash ret 700 myńnan tómen túsken. Al 2025 jyly neke sany 1,1%-ǵa ósip, 505 myńǵa jetti. Bul týý kórsetkishiniń quldyraýyn ishinara jumsartqanymen, jylyna 600 myń neke tirkelgen pandemııaǵa deıingi deńgeıden áli de tómen.
Týý kórsetkishiniń ósýi tek eki prefektýrada — Tokıo jáne Isıkava tirkelgen. El astanasynda týý sany sońǵy toǵyz jylda alǵash ret artty, bul halyqtyń kóshi-qony men balaly otbasylardy qoldaý sharalarymen baılanystyrylady. Al Isıkavada ósim 2024 jylǵy joıqyn jer silkinisinen keıingi tómendeýden endi bas kóterip keledi.
Qalǵan 45 prefektýrada týý kórsetkishi tómendeýin jalǵastyryp otyr. Ásirese Sımane, ıAmagata, Aomorı jáne Nagano aımaqtarynda quldyraý aıqyn baıqalady. Aýyldyq óńirlerde halyq sany azaıyp jatyr, sebebi turǵyndar oqý men jumys úshin basqa jaqqa kóshe bastaǵan.
2025 jyly Japonııada 1,61 mıllıon ólim tirkelgen, bul 2024 jylmen salystyrǵanda 13 myńǵa az. Salystyrý úshin aıtsaq, 1973 jyly elde eki mıllıonnan astam bala dúnıege kelgen, al 2016 jyly týý kórsetkishi alǵash ret bir mıllıonnan tómen túsken edi.
Aıta keteıik, Qazaqstanǵa Japonııadan kelgen týrıster qatary 9 myńnan asqanyn jazdyq.