Japonııada týdy qorlaýǵa tyıym salatyn zań kúshine endi
ASTANA. KAZINFORM – Japonııada memlekettik týdy qorlaǵany úshin jaza qarastyratyn zań beısenbi kúni kúshine endi. Premer-mınıstr Sanae Takaıchı uzaq ýaqyt boıy qoldap kelgen bul bastama sóz bostandyǵyna qatysty alańdaýshylyq týǵyzdy. Bul týraly Kyodo News jazdy.
Zańǵa sáıkes, «Hınomarý» dep atalatyn Japonııanyń memlekettik týyn kópshilik aldynda búldirgen, alyp tastaǵan nemese qorlaǵan adam, eger onyń áreketi ózgelerdiń «qatty jaısyzdanýyna nemese jıirkenýine» sebep bolsa, eki jylǵa deıin bas bostandyǵynan aıyrylýy nemese 200 myń ıenge (shamamen 1300 dollar) deıin aıyppul tóleýi múmkin.
Buǵan deıin Japonııanyń qylmystyq zańnamasynda shet memleketterdiń týyn búldirgeni úshin jaýapkershilik qarastyrylǵanymen, óz eliniń týyna qatysty mundaı norma bolmaǵan.
Zań jobasyn bıliktegi Lıberal-demokratııalyq partııa, onyń koalıtsııalyq seriktesi Japonııa ınnovatsııalar partııasy jáne birqatar oppozıtsııalyq partııa usyndy. Qujat shilde aıynyń ortasynda parlamentte qabyldandy.
Talqylaý kezinde oppozıtsııa zańnyń konstıtýtsııalyq quqyqtarǵa yqpalyna jáne onyń tym keń qoldanylýy múmkin ekenine alańdaýshylyq bildirdi. Ulttyq polıtsııa agenttigi óńirlik polıtsııaǵa árbir jaǵdaıdy muqııat baǵalap, qamaýǵa alýdyń negizi men qajettiligin jan-jaqty tekserýdi tapsyrdy.
Zań jekelegen jaǵdaılardyń mán-jaıyna qaraı qoldanylady. Al qoǵamdyq emes jerde túsirilgen kórkem fılmderdegi, sondaı-aq anıme, manga, beıneoıyndar men jasandy ıntellekt kómegimen jasalǵan vıdeolardaǵy týdy qorlaý kórinisteri úshin jaza qarastyrylmaǵan.
4 tamyzda 200-ge jýyq konstıtýtsııalyq quqyq mamany zańnyń kúshin joıýǵa shaqyrdy. Olardyń pikirinshe, ol bılikti synaıtyn kózqarastardy shekteýi múmkin ári Japonııada memlekettik týdy qorlaý oqıǵalary sırek kezdesetindikten, mundaı zańǵa qajettilik az.
Alaıda Kyodo News agenttiginiń shilde aıynyń sońynda júrgizgen saýalnamasynda respondentterdiń 55,8%-y jańa zańdy qoldasa, 38,9%-y qarsy pikir bildirgen.
Aıta keteıik, Japonııa premer-mınıstri Sanae Takaıchı Iran prezıdenti Masýd Pezeshkıanmen telefon arqyly sóılesip, Ormýz buǵazy arqyly kemelerdiń ótýine qosymsha aqy salynbaýy kerek ekenin málimdedi.
