Japonııada tótenshe jaǵdaı taǵy bir aıǵa uzartylýy múmkin
TOKIO. QazAqparat – Japonııa úkimeti jańa koronavırýstyń taralýyn toqtatý úshin jalpyulttyq tótenshe jaǵdaıdy shamamen taǵy bir aıǵa uzartý týraly máseleni qarastyrýda, dep habarlaıdy QazAqparat Kyodo agenttigine silteme jasap.
Beısenbi kúni úkimettik derekkózder habarlaǵandaı, 7 sáýirde eldiń premer-mınıstri Sındzo Abe Tokıoda, Osaka men basqa da bes prefektýrada 6 mamyrǵa deıin tótenshe jaǵdaı engiziletindigi týraly jarııalaǵan. Óıtkeni osy aýdandarda aýrý juqtyrǵandar sany kúrt ósken.
Sáýir aıynyń sońynda bastalatyn Golden Week (Altyn apta) merekesi qarsańynda 16 sáýirde eldiń barlyq 47 aımaǵynda tótenshe jaǵdaı rejımi engizilgen bolatyn. Osy ýaqytta kóptegen japon azamattary úılerine qaıtatyn ıa bolmasa saıahatqa attanatyn. Altyn apta – Shyǵys Azııa elderinde demalys kúnderimen biriktirilgen birneshe merekelik kúnniń ataýy.
Tótenshe jaǵdaı kezinde jergilikti bılik turǵyndardan qajetsiz serýennen bas tartýdy surady, al keıbir kompanııalarǵa jumysyn toqtatýdy usyndy.
Úkimet tótenshe jaǵdaı eldiń barlyq aımaǵynda óz kúshinde qalýy kerek dep sanaıdy. Óıtkeni tótenshe jaǵdaıdyń birtindep alynyp tastalýy belgili bir aýdandarda adamdar top bolyp jınalýyna ákelip, ınfektsııanyń taralý qaýpin arttyrady.
Prefektýralardyń gýbernatorlary 6 mamyrda aıaqtalatyn demalys maýsymynan keıin tótenshe jaǵdaıdy uzartýǵa shaqyrdy.
Búginde Japonııada vırýs juqtyrýdyń 14 800-ge jýyq jaǵdaıy rastalǵan, onyń ishinde 700-i – aqpan aıynda Tokıoda karantınge jiberilgen Diamond Princess krýız laıneriniń jolaýshysy. Vırýstan qaıtys bolǵandar sany 450 adamǵa jetti.
