Japonııada tolassyz jaýǵan jańbyr jeti adamnyń ómirin qıdy
ASTANA. KAZINFORM — Japonııanyń Isıkava prefektýrasynda rekordtyq kólemde jańbyr jaýyp, jeti adam qaza tapty. Eki turǵyn iz-túzsiz joǵalyp ketken, taǵy tórteýimen baılanysý múmkin bolmaı jatyr. Bul týraly NHK telearnasy habarlady.
Eldegi kóshkin saldarynan 10 jumysshynyń Nakaıa týnnelinde qalyp, ekeýiniń qaza tapqany atap ótildi.
Sondaı-aq, kóshkin men ózen tasqynynan keıin qıraǵan turǵyn úıdiń astynan zardap shekkender tabyldy.
Telearnanyń habarlaýynsha, tabıǵı apattan negizinen Noto aýyly, Vadzıma jáne Sýdzý qalalary zardap shekken.
Sondaı-aq olar aǵymdaǵy jyldyń 1 qańtarynda bolǵan kúshti jer silkinisinen eń kóp zardap shekken eldi mekender. 21-22 qyrkúıekte Isıkava prefektýrasynyń jeti qalasy men eldi mekeninde 131 400 adam evakýatsııalanǵan.
Vadzıma men Sýdzý qalalarynda 21 qyrkúıekte rekordtyq jaýyn-shashyn tirkeldi. Atap aıtqanda, bir táýlikte Vadzımada 300 mm, Sýdzýda 200 mm jaýyn jaýǵan. Bul — 1975 jyldan beri baıqalǵan eń joǵary kórsetkish.
