Japonııada Tokıonyń eki qosalqy qalasy anyqtalmaq
ASTANA. 14 sáýir. QazAqparat - Japonııada Tokıonyń qosalqy qalalary paıda bolýy múmkin.
"Japondyq parlamenttiń bir top depýtattary, taǵy qatty jer silkinisi bola qalǵan jaǵdaıda, elorda mindetin Tokıodan dereý kóshirý úshin eń joq degende eki qosymsha alań qurý týraly usynys jasady", - dep habarlaıdy «Maıak» radıosy.
Parlamentshiler qazir aǵymdaǵy jyldan bastap osyndaı eki ákimshilik qalanyń qurylysyna kirisýge múmkindik beretin zań jobalaryn ázirleýde.
Esterińizge sala keteıik, 11 naýryzda bolǵan 9 baldyq zilzalanyń saldarynan Tokıoda kólik qozǵalysy ýaqytsha toqyrap, telefon baılanysy úzilgen bolatyn. Jer silkinisiniń kindigi Tokıodan 300 shaqyrymnan astam qashyqtyqta bolǵanyna qaramastan, elordada sondaı-aq jaryq sónip, tutynýshylyq taýarlardyń jetkizilimi de kidirgen edi.
