Japonııada Toqaevtyń saparynyń nátıjeleri joǵary baǵalandy
ASTANA. KAZINFORM — Qazaqstannyń Japonııadaǵy Elshisi Erlan Baýdarbek-Kojataev Japonııanyń Ósý strategııasy jónindegi Lıberaldy‑demokratııalyq partııasy shtabynyń basshysymen, Japonııanyń burynǵy Premer-mınıstri Fýmıo Kıshıdamen kezdesý ótkizdi. Bul týraly SІM baspasóz qyzmeti málim etti.
LDP-nyń Ósý strategııasy jónindegi shtaby ekonomıkanyń básekege qabilettiligin arttyrýǵa jáne jasandy ıntellekt, jartylaı ótkizgishter men energetıkany qosa alǵanda, 17 strategııalyq salaǵa ınvestıtsııalar tartý arqyly ósimdi qamtamasyz etýge baǵyttalǵan ekonomıkalyq saıasatty ázirleıtin negizgi organ.
E.Baýdarbek-Kojataev japon saıasatkerin Qazaqstandaǵy saıası jáne ekonomıkalyq reformalardyń negizgi baǵyttarymen tanystyryp, ınvestıtsııalyq ahýaldy jaqsartý, qorshaǵan ortany qorǵaý jáne logıstıkany jańǵyrtý jónindegi sharalarǵa erekshe nazar aýdardy.
— F.Kıshıda Japonııa Qasym‑Jomart Toqaevtyń Tokıoǵa resmı saparynyń jáne 2025 jylǵy jeltoqsanda ótken «Ortalyq Azııa — Japonııa dıalogynyń birinshi sammıti» qorytyndylary boıynsha qol jetkizilgen kelisimderdi tolyq júzege asyrýǵa nıetti ekenin atap ótti. Ol Memleket basshysynyń Narýhıto jáne Japonııanyń Premer-mınıstri Sanae Takaıtımen kezdesýleriniń ekonomıkalyq jáne ınvestıtsııalyq baılanystardy nyǵaıtý úshin jańa múmkindikter ashqanyn erekshe atap ótti, — delingen habarlamada.
Japon saıasatkeri sondaı-aq Japonııa men Qazaqstan arasyndaǵy yntymaqtastyqtyń jasandy ıntellekt pen tsıfrlyq tehnologııalar sııaqty jańa baǵyttarda keńeıýin quptap, birlesken jobalardy damytý úshin onyń áleýeti joǵary ekenine toqtaldy.
Kezdesýge sondaı-aq Japonııa Syrtqy ister mınıstrliginiń Ortalyq Azııa boıynsha arnaıy ókili, Elshi Masakı Ishıkava qatysty.
Eske sala keteıik, ótken jyldyń jeltoqsan aıynyń basynda Qasym-Jomart Toqaev Japonııaǵa resmı saparmen bardy.
