Japonııada taıfýnnan bir adam mert bolyp, 86-sy zardap shekti
ASTANA. QazAqparat - Japonııada «Lan» joıqyndy taıfýnynyń saldarynan bir adam mert bolyp, 86-sy jaraqattandy. NHK telearnasy habarlaǵandaı, Fýkýoka qalasynda 63 jastaǵy jergilikti turǵyndy qurylys nysany aınalasyna ornatylǵan aǵash satylar basyp qalǵan. El óńirlerinde adamdardyń ústine ártúrli zattar, jarnama qalqandary, aǵashtardyń butaqtary qulaǵan.
Sondaı-aq Vakaıama prefektýrasynda úıi laı kóshkini saldarynan qıraǵan 82 jastaǵy zeınetker iz-túzsiz joǵaldy. Qatty daýyl men tolassyz jaýǵan jaýynǵa baılanysty jolaýshylar poıyzdarynyń qozǵalysy men áýe reısteri toqtatyldy.
Meteorologtardyń atap ótýinshe, taıfýnnyń oshaǵy qazir Honsıý aralynyń soltústik bóliginde ornalasyp otyr.
