Japonııada taıfýn saldarynan 100-den astam áýe reısi toqtatyldy
NUR-SULTAN. QazAqparat – Japonııanyń áýe kompanııalary eldiń ońtústiginde bastalǵan taıfýn saldarynan 119 ishki áýe reısin toqtatty. Bul týraly QazAqparat NHK telearnasyna silteme jasap habarlaıdy.
Onyń málimetinshe, ushý kestesindegi ózgerister kóbine Japonııanyń ońtústigindegi Kagosıma men Okınava prefektýralary áýejaılaryna qatysty bolyp otyr.
Budan basqa, surapyl jelden bolǵan ǵımarat qurylystarynyń opyrylýynan kem degende segiz adam jaraqat alǵan.
Telearnanyń málimetinshe, taıfýn eldiń ońtústik batys bóligindegi Kıýsıý aralyna jaqyndap qaldy. Osyǵan baılanysty aralda ornalasqan Nagasakı prefektýrasynyń basshylyǵy 20 myńǵa jýyq jergilikti turǵyndy qaýipsiz jerge kóshirý týraly ókim shyǵardy. Budan basqa, ońtústik batystaǵy Oıta prefektarýrasynyń 70 myńǵa jýyq turǵyny da evakýatsııalanady.
Qazirgi kezde taıfýn Qytaıǵa qaraı jaqyndap keledi. Onyń ortalyq bóligindegi jeldiń jyldamdyǵy sekýndyna 45 metrge deıin jetip otyr. Bul – 2020 jyly Tynyq muhıtta bolǵan toǵyzynshy taıfýn.
