Japonııada «Talas» daýyly 24 adamnyń ómirin qıdy
ASTANA. 5 qyrkúıek. QazAqparat - Japonııa araldarynyń ústimen ótken «Talas» daýyly keminde 24 adamnyń ómirin qıdy, 54 adam iz-túzsiz ketti, dep habarlady japondyq NHK aqparattyq agenttigi.
Qutqarý shtabyndaǵylar qaza tapqandar qatary artýy múmkin degendi aıtady, izdeý jasaqtary taýly jerlerdegi barlyq zardap shekken aýdandarǵa jete qoıǵan joq.
Aldyn ala málimetterge qaraǵanda, elde jol-kólik ınfraqurylymy túgeldeı isten shyqty, áýejaılar men temirjol qatynasy jabyldy. Ásirese Vakaıama jáne Nara prefektýralary edáýir zardap shekti. Eldiń búkil ońtústiginde ózender arnasynan asty.
Búginde daýyl saǵatyna 20 shaqyrymdyq jyldamdyqpen RF-nyń Prımore ólkesine qaraı bet aldy, onda aımaq turǵyndaryna eskertý jasalǵan.
