Japonııada Super Mario stılindegi júgirý jarysy ótedi
ASTANA. KAZINFORM – Japonııanyń Sapporo qalasynda 13 qyrkúıekte Super Mario stılinde bezendirilgen tematıkalyq júgirý jarysy ótedi. Qatysýshylardy áıgili beıneoıyndar serııasyndaǵy áýender, Nintendo keıipkerleri, fotoaımaqtar jáne estelik syılyqtar kútedi, dep habarlaıdy Kyodo.
Erekshe sporttyq shara Hokkaıdo aralynda ótedi jáne Japonııada alǵash ret Super Mario taqyrybynda ótetin júgirý jarysy bolmaq.
Іs-sharany Doshin EC Inc. kompanııasy uıymdastyrady. Uzyndyǵy 2,5 shaqyrym bolatyn baǵyt Sapporodaǵy Daiwa House Premist Dome stadıonynyń ishi men aınalasyn qamtıdy. Qatysýshylar búkil qashyqtyq boıy Super Mario oıyndaryndaǵy mýzykany tyńdaıdy.
Júgirýshiler úshin Marıo jáne franshızanyń basqa da keıipkerlerimen arnaıy fotoaımaqtar daıyndalady. Uıymdastyrýshylar márede tosynsyı bolatynyn da ýáde etti.
Tirkelgen árbir qatysýshyǵa fırmalyq fýtbolka, kepka, súlgi jáne shekteýli serııamen shyǵarylǵan estelik medal tabystalady. Sondaı-aq is-shara ótetin aýmaqta eksklıýzıvti taýarlar satylady.
Jarysqa eń kóp degende 6 myń adam qatysa alady. Tirkelý is-sharanyń resmı saıtynda júrgiziledi. Qatysý quny joǵary synyp oqýshylary men eresekter úshin 6 600 ıendi (shamamen 41 AQSh dollary), al úsh jastan bastaýysh synyp jasyna deıingi balalar úshin 5 500 ıendi quraıdy.
Júgirýge qatyspaıtyn qonaqtar da is-shara alańyna kire alady. Olar úshin balalar oıyn aımaqtary uıymdastyrylyp, Nintendo Switch 2 oıyn konsolin synap kórýge múmkindik beriledi.
Nintendo kompanııasy 1985 jyly shyǵarǵan Super Mario franshızasy álemdegi eń tanymal beıneoıyndar serııalarynyń biri sanalady. Onyń basty keıipkeri – santehnık Marıo – oıyn ındýstrııasyndaǵy eń tanymal beınelerdiń birine aınalǵan.
Eske sala ketsek, buǵan deıin Gollıvýdtyń «Narýto» anımesindegi rólderge álemniń túkpir-túkpirinen jasóspirimderdi izdep jatqany habarlanǵan.
