Japonııada stýdııany órtegen adam ólim jazasyna kesildi

ASTANA. KAZINFORM - Japonııada sot 2019 jyly Kıoto Animation stýdııasyn órtep jibergen Sındzı Aobany ólim jazasyna kesti, dep habarlaıdy Kyodo News. 

Órt saldarynan 36 adam qaza tapty.

Buǵan deıin 45 jastaǵy Aoba 2019 jylǵy 18 shildede Kıotodaǵy anımatsııalyq stýdııany órtegenin moıyndaǵan. Japon tarıhynda eń qyrǵyn oqıǵalardyń birine aınalǵan órtten qaza tapqandardan basqa taǵy 32 qyzmetker zardap shekti.

Aoba ony qylmysqa Kyoto Animation onyń romanyn kóshirip aldy dep oılaǵandyqtan barǵanyn aıtty.

Sýdıa Aobanyń shynymen de sandyraqtan zardap shekkenin moıyndady, biraq bul onyń minez-qulqyna az áser etkenin jáne sottalýshynyń sol kezde «esi durys emes nemese áreketke qabiletsiz bolmaǵanyn» qosyp ótti.

Sot 36 adamnyń ólimine jaýapkershilikti «óte aýyr» dep tapty.

Aoba alǵash ret 6 jeltoqsanda ótken sot protsesinde keshirim surady. Sot úkimi shyqqanǵa deıin aıtar sóziń bar ma degen suraqqa sottalýshy joq dep jaýap berdi. Sondaı-aq ol sot úkimin shyǵarǵan kezde de onsha reaktsııa bildirgen joq.

Úkimge sáıkes, Aoba stýdııaǵa tańǵy 10:30 shamasynda kirip, benzın qoldanyp órt shyǵarǵan. Ol kezde ǵımaratta 70 qyzmetker jumys istegen.

Sot ótken jyldyń qyrkúıeginde, oqıǵadan tórt jyldan astam ýaqyt ótken soń bastaldy. Buǵan Aoba ómirine qaýip tóndiretin kúıik alyp, qarqyndy emdeý men ońaltýdy qajet etýi sebep bolǵan.

Kyoto Animation stýdııasy búkil álemdegi anıme jankúıerleri arasynda erekshe shyǵarmalarymen tanymal, sonyń ishinde «K-On!» jáne «Harýhı Sýdzýmııanyń melanholııasy» bar.