Japonııada shamamen 350 myń adam keminde bir ret kokaın tutynǵan — zertteý
ASTANA. KAZINFORM — Japonııada 15 pen 64 jas aralyǵyndaǵy shamamen 350 myń adam ómirinde keminde bir ret kokaın tutynyp kórgen, dep habarlaıdy Kazinform agenttiginiń tilshisi Kyodo News agenttigine silteme jasap.
Bul — 2007 jyldan beri qoldanylyp kele jatqan zertteý ádistemesi boıynsha tirkelgen eń joǵary kórsetkish.
Japonııanyń Densaýlyq saqtaý, eńbek jáne ál-aýqat mınıstrligi 2025 jyly júrgizgen zertteý nátıjesine sáıkes, respondentterdiń 0,4%-y kokaın qoldanǵanyn moıyndaǵan.
Zertteý qorytyndysynyń jarııalanýy kokaınge qatysty qylmystyq ister sanynyń rekordtyq deńgeıge jetýimen tuspa-tus keldi. 2025 jyly polıtsııa kokaınge baılanysty 804 adamdy jaýapkershilikke tartqan. Bul — aldyńǵy jylmen salystyrǵanda 218 adamǵa kóp.
Eldegi eń kóp qoldanylatyn zańsyz esirtki áli de marıhýana bolyp otyr. Saýalnamaǵa qatysýshylardyń 1,6%-y, ıaǵnı shamamen 1,41 mıllıon adam ony qoldanǵanyn aıtqan.
Ulttyq nevrologııa jáne psıhıatrııa ortalyǵynyń zertteý jetekshisi Takýıa Sımaneniń aıtýynsha, zańsyz esirtki tutyný qurylymy ózgerip keledi.
— Buryn negizgi esirtki retinde stımýlıatorlar qoldanylatyn. Qazir Eýropa men AQSh-taǵy sııaqty úrdis marıhýana men kokaınge qaraı aýysyp jatyr. Bul qaıtalama táýeldiliktiń aldyn alý sharalaryn kúsheıtý qajet ekenin kórsetedi, — dedi ol.
Zertteý toby 2025 jyldyń qazan-jeltoqsan aılary aralyǵynda halyqtyń negizgi tirkeliminen kezdeısoq tańdalǵan 5 myń adamǵa saýalnama joldaǵan. Onyń 3 156-sy jaramdy jaýap bergen. Zertteý avtorlary málimetterdiń qatysýshylardyń óz jaýaptaryna negizdelgenin, sondyqtan esirtki qoldanýshylardyń naqty sany budan da kóp bolýy múmkin ekenin atap ótti.
Saýalnama nátıjesine sáıkes, erlerdiń 0,5%-y, áıelderdiń 0,3%-y ómirinde keminde bir ret kokaın qoldanǵan. Bul shamamen 210 myń er adam men 140 myń áıelge teń.
Jas ereksheligi boıynsha eń joǵary kórsetkish 40 jastaǵy azamattar arasynda tirkelgen. Bul toptyń 0,7%-y, ıaǵnı shamamen 130 myń adam kokaın tutynǵanyn aıtqan.
Sonymen qatar, esirtki satyp alý týraly usynystarǵa kóbine 20 jas shamasyndaǵy jastar tap bolǵan. Bul týraly saýalnamaǵa qatysýshylardyń 1,2%-y, ıaǵnı shamamen 140 myń adam málimdegen.
Er adamdarǵa kóbine marıhýana men stımýlıatorlar, al áıelderge kokaın usynylǵan. Polıtsııanyń málimetinshe, kóptegen adam esirtkini áleýmettik jeliler arqyly satyp alady.
Japonııada esirtki qoldaný deńgeıine qatysty zertteýler 1995 jyldan beri eki jyl saıyn júrgizilip keledi.
Buǵan deıin Japonııa sheteldikter úshin vızalyq alymdy bes esege arttyrǵanyn jazǵanbyz.
