Japonııada saýsaq tańbalaryn qashyqtan túsiretin prıbor oılap tabyldy
ASTANA. QazAqparat - Japondyq polıtseılik basqarý ǵylymı-zertteý ınstıtýty men Vaseda ýnıversıtetiniń ǵalymdary saýsaq tańbalary beınesin qashyqtan alýǵa múmkindik beretin prıbor jasap shyǵardy.
«Sot gıperspektraldi proektory» degen ataýǵa ıe bolǵan prıbor qashyqtan kez kelgen zattan adam saýsaǵynyń izderin eseptep shyǵara alady, dep habarlady RIA Novostı. Prıbor jasyl tústi lazer sáýlesin zatqa baǵyttaıdy jáne onda qalǵan saýsaqtar men alaqan tańbalaryndaǵy maılar men beloktardyń usaq izderiniń beınesin jasap shyǵarady. Apparatta beıneni alýǵa bir mınýt qana ýaqyt ketedi.
Sonymen birge, onyń kómegimen saýsaqtar men alaqan jumylsa da tańbanyń anyq beınesin alýǵa bolady. Osy kezge deıin mundaı jaıtqa sot medıtsınalyq sarapshylardy qol jetkize almaǵan bolatyn. Proektordaǵy «kópqabatty» tańbanyń dáldigi 70 paıyzdan asady.
Apparatty jasaýǵa Jerdi qashyqtan zondtaýda qoldanylatyn ǵaryshtyq tehnologııa paıdalanyldy.
Ǵalymdar endi eki jyldyń ishinde prıbor krımınalıstıkada keńinen qoldanylady dep sanaıdy. Prıbordy qylmys jasalǵan jerde qoldaný qysqa merzimde ınternet arqyly túsirilimdi málimetter bazasyna engizýge jáne ony polıtsııanyń qolynda bar tańbalarmen salystyrýǵa múmkindik beredi.
Bolashaqta zattaǵy saýsaqtar tańbasy ǵana emes, jasýsha týraly bolmashy aqparattyń ózin DNK taldamasy úshin de qoldanýǵa bolady.
