Japonııada Sakýradzıma janartaýy atqylaı bastady

ASTANA. KAZINFORM — Japonııanyń ońtústigindegi Kagosıma shyǵanaǵyndaǵy túbekte ornalasqan Sakýradzıma janartaýy atqylaǵanyn Japonııa meteorologııa basqarmasynyń derekterine silteme jasap Anadoly habarlady.

Vedomstvonyń málimetinshe, atqylaý jergilikti ýaqytpen 00:57-de boldy. Kúl baǵany shamamen 4 400 metr bıiktikke kóterilgen.

Qurban bolǵandar men zardap shekkender jóninde aqparat joq. Jaqyn mańdaǵy eldi mekenderde de ǵımarattardyń zaqymdanýy tirkelmegen.

Atqylaýdan keıin janartaýdyń belsendiligi jalǵasa tústi. Bılik kórshiles prefektýralarǵa tútin men kúldiń taralýy múmkin ekenin eskertti.

Sakýradzıma Japonııadaǵy eń belsendi janartaýlardyń biri bolyp sanalady. 2016 jyldyń aqpanynan beri onyń kraterine kirý shektelgen. Janartaýǵa eki kılometrden jaqyn barýǵa tyıym salynǵan.

Janartaý ornalasqan túbek buryn Kagosıma shyǵanaǵyndaǵy jeke aral bolǵan. Alaıda 1914 jylǵy Japonııa tarıhyndaǵy eń iri atqylaýdan keıin lava aǵyndary shyǵys jaǵalaýdyń bir bóligin toltyryp, araldy Osýmı túbegimen qosyp jiberdi.

Eske sala keteıik, buǵan deıin Gavaııdegi Kılaýea janartaýynan qaıtadan rekordtyq deńgeıde lava fontandary atqylaǵanyn jazǵan edik.