Japonııada «Robot jáne ómir» taqyrybynda qultemirler kórmesi ótti
ASTANA. QazAqparat - Kúnshyǵys eliniń ónertapqyshtary jańa týyndylaryn kópshilikke tanystyrdy. Japonııa astanasy Tokıoda «Robot jáne ómir» taqyrybynda qultemirler kórmesi ótti, dep habarlady www.24.kz.
Mundaǵy qultemirdiń keıbiri kúndelikti turmysta adamǵa kómekshi bolsa, endi biri búldirshinniń kóńilin aýlaıdy. Arasynda kelbeti de, qımyly da kádimgi tiri adamǵa uqsaıtyndary bar. Tokıodaǵy «Aldyńǵy qatarly ǵylym jáne ınnovatsııa» ulttyq murajaıyna kelgender Alter esimdi qultemirdi kórip qaıran qaldy. Qurastyrýshylar onyń túri men qımyl áreketin adamǵa barynsha uqsatýǵa tyrysqan. Ol 42 qozǵaltqyshtyń kómegimen qımyldaıdy jáne elektrondy júıesi qorshaǵan ortany sezinýge beıimdelgen.
«Biz ómir jáne odan alynatyn energııany tolyqtaı zerttep bilgen joqpyz. Degenmen, Alterge adamǵa tıesili qasıetterdi qondyra alǵan bolsaq, osynyń ózi adamzat tarıhyndaǵy adamǵa uqsap sezine alatyn alǵashqy qultemir bolmaq», - deıdi qultemir qurastyrýshy ınjener Hırosı Isıgýro.
Kórmede adamǵa kómekshi bolýǵa ázir turǵan qultemirdiń túr-túri bar. Qurastyrýshylar adam ómirin jeńildetý úshin qoldan kelgenniń bárin jasaǵan. Kelýshilerdiń de qalaýy san túrli.
«Men qultemirlerdiń kúndelikti turmysta adamǵa tamaq ishýge, ári-beri júrip-turýǵa jáne jýynýyna kómekshi bolǵanyn qalar edim», - degen pikir qosty 70 jastaǵy kórme qonaǵy Kıoheı Matsıýı.
Telenoide kompanııasy oılap tapqan qultemir adamnyń júzindegi emotsııa men daýys yrǵaǵyn birden sezedi. Qurastyrýshy onyń kelbetin jasaý óte qıyn bolǵanyn aıtady.
«Telenoide qultemiriniń negizgi ereksheligi - betinde. Adam oǵan sóılegen kezde júzinde baıqalǵan emotsııaǵa qarap robot ózgeredi. Bul sizdiń aldyńyzda naǵyz adam turǵandaı áser qaldyrady», - dedi Telenoide kompanııasynyń ókili Tasýký ıAmaoa
Qultemirler kórmeni tamashalaýǵa kelgenderdiń báriniń kóńilinen shyqty. Ásirese olarmen oınaǵan balalar máz-maıram.
