Japonııada robot arqyly qaterli isikke alǵash ret qashyqtan ota jasaldy
ASTANA. KAZINFORM — Japonııada tamyz aıynan bastap ishek qaterli isigine shaldyqqan bes naýqasqa hırýrgııalyq robottyń kómegimen sátti ota jasaldy. Robotty ártúrli jerde ornalasqan dárigerler qashyqtan basqarǵan, dep habarlaıdy Kazinform Kyodo agenttigine silteme jasap.
Hırosakı ýnıversıteti men Japon hırýrgııalyq qoǵamynyń habarlaýynsha, jańa tásil dárigerlerdiń jetispeýshiligi men medıtsına mamandarynyń aımaqtar boıynsha birkelki bólinbeýi máselesin sheshýge kómektesedi.
Operatsııalardy Hırosakı ýnıversıtetiniń aýrýhanasy men Tsýgarý aýrýhanasynyń mamandary júrgizdi. Eki medıtsınalyq mekeme de Japonııanyń soltústik-shyǵysyndaǵy Aomorı prefektýrasynda ornalasqan.
Ota jasaý kezinde hırýrgtardyń biri japonııalyq Medicaroid kompanııasy qurastyrǵan Hinotori robotyn tikeleı basqarsa, ekinshi maman basqa jerden qashyqtan qosylyp, robottyń kómegimen áriptesine qoldaý kórsetken.
Hırosakı ýnıversıteti men Japonııa hırýrgııalyq qoǵamynyń málimetinshe, bul — Japonııa tarıhynda hırýrgııalyq robottyń kómegimen ártúrli jerde otyrǵan dárigerler birlesip ota jasaǵan alǵashqy klınıkalyq jaǵdaı.
Jospar boıynsha, naýryzǵa deıin ádistiń qaýipsizdigin tekserý úshin taǵy birneshe ota jasalady. Odan keıin uıymdastyrýshylar qajetti jabdyqtardy qoldanýǵa ruqsat alyp, qashyqtan robot arqyly jasalatyn otalardy ulttyq medıtsınalyq saqtandyrý júıesine engizýge kúsh salmaq.
— Bizdiń basty maqsatymyz – shalǵaı óńirlerdegi naýqastardyń da sapaly hırýrgııalyq kómek alýyna múmkindik jasaý, – dedi Tokaı ýnıversıtetiniń professory, Japonııa hırýrgııalyq qoǵamynyń qashyqtan hırýrgııany damytý komıtetiniń tóraǵasy Masakı Morı.
Onyń sózinshe, qashyqtan basqarylatyn robot arqyly ota jasaý tehnologııasyn shamamen eki jyldan keıin keńinen qoldaný josparlanyp otyr.
Hırosakı ýnıversıteti men Japonııa hırýrgııalyq qoǵamy qashyqtan ota jasaý ádisin búkil elge engizýdi josparlap otyr. Bul naýqastarǵa turǵylyqty jerine jaqyn jerde qajetti hırýrgııalyq kómek alýǵa, sondaı-aq basqa óńirlerge baryp emdelýge ketetin ýaqyt pen shyǵyndy qysqartýǵa kómektesedi.
Buǵan deıin Japonııanyń Ózin-ózi qorǵaý kúshteri ásker tapshylyǵyna baılanysty JI-men jasaqtalǵan adam tárizdi robottardy qorǵanys salasynda qoldanýdy zerttep jatqany týraly habarlaǵan bolatynbyz.
