Japonııada poıyz jolynyń buzylýynan 51 myń adam jolda qaldy
ASTANA. QazAqparat - Elektr júıesindegi aqaýǵa baılanysty Japonııanyń "sınkansen" júrdek poıyzynyń 51 myń jolaýshysy Tokıo men Fýkýoka qalalary arasyndaǵy eldiń eń mańyzdy temirjol tarmaǵynda toqtap qaldy, dep habarlaıdy TASS agenttigi.
Central Japan Railway kompanııasynyń ókili ıAsýıýkı Hamasakı jolaýshylardan keshirim surady. «Temirjolda oryn alǵan keleńsizdikke baılanysty jolaýshylardan keshirim suraımyz», - dedi ol baspasóz konferentsııasynda.
Kompanııanyń málimetinshe, elektr jelisi jumysynyń buzylýy sársenbi kúni keshke Takatsýkı qalasynyń aýmaǵynda (Oskak prefektýrasy) bolǵan, onyń saldarynan Tokıodan Fýkýokadaǵy Hakat stantsııasyna deıingi joldardyń barlyǵynan aqaý shyqqan.
Jóndeý jumystaryn júrgizýge bes saǵattaı ýaqyt ketti, osy aralyqta jolda 3-6 saǵat boıy 60-qa jýyq quramdar toqtap turdy.
