Japonııada paıyzdyq mólsherleme 31 jyldyq rekordqa jetti
ASTANA. KAZINFORM — Japonııanyń ortalyq banki 18 qyrkúıek, juma kúni negizgi paıyzdyq mólsherlemeni 1%-dan 1,25%-ǵa deıin kóterdi. Bul – sońǵy 31 jyldaǵy eń joǵary kórsetkish. Bul týraly Euronews jazdy.
Euronews málimetinshe, Japonııa banki ondaǵan jyl boıy nólge jýyq nemese odan da tómen deńgeıde ustalyp kelgen asa tómen paıyzdyq mólsherlemelerden birtindep bas tartyp, aqsha-nesıe saıasatyn qalypqa keltirýge tyrysyp jatyr. Buǵan deıin tómen mólsherlemeler nesıe alýdy yntalandyrý, tutynýshylyq suranysty arttyrý, deflıatsııamen kúresý jáne el ekonomıkasyn uzaqqa sozylǵan toqyraýdan shyǵarý maqsatynda qoldanylǵan.
Alaıda qazir ınflıatsııalyq qysym kúsheıip otyr. Buǵan munaı baǵasynyń sońǵy aılarda kúrt qymbattaýyna sebep bolǵan Irandaǵy soǵys ta áser etýde. Tabıǵı resýrstary shekteýli jáne munaıdy is júzinde tolyqtaı ımporttaıtyn Japonııa úshin bul eleýli ekonomıkalyq táýekel bolyp otyr.
Mólsherlemeni kóterý týraly sheshim aqsha-nesıe saıasaty jónindegi keńestiń eki kúndik otyrysynyń qorytyndysy boıynsha qabyldandy. Bul qadam naryq qatysýshylary úshin kútpegen jaǵdaı bolǵan joq jáne onyń yqpaly álemdik naryq baǵalaryna aldyn ala edáýir dárejede engizilgen.
Japonııanyń sheshimi AQSh Federaldyq rezerv júıesiniń (FRJ) osy aptadaǵy qadamynan keıin qabyldandy. Sársenbi kúni FRJ 2023 jyldan beri alǵash ret bazalyq paıyzdyq mólsherlemeni kóterip, turaqty joǵary deńgeıde qalyp otyrǵan ınflıatsııany tejeýge baǵyttalǵan sharalardy kúsheıtti.
AQSh tarapy da ıenanyń álsireýine baılanysty Japonııany paıyzdyq mólsherlemeni kóterýge shaqyryp keledi. Sarapshylardyń baǵalaýynsha, Japonııa banki jyl sońyna deıin nemese kelesi jyldyń basynda mólsherlemeni taǵy da kóterýi múmkin.
Jaqynda eki eldiń bıligi ıenany qoldaý maqsatynda birlesken valıýtalyq ınterventsııa júrgizdi. Qazir AQSh dollary shamamen 155 ıen deńgeıinde saýdalanyp jatyr. Al jyl basynda dollar baǵamy 160 ıennen asqan edi.
Japonııa banki ınflıatsııanyń jyldyq deńgeıin shamamen 2% shamasynda ustaýdy kózdeıdi. Qazir eldegi ınflıatsııa osy maqsatty kórsetkishke jýyqtap otyr. Degenmen kóptegen tutynýshy baǵanyń tym qatty óskenine shaǵymdanýda. Ásirese benzın men munaı ónimderine baılanysty taýarlar baǵasynyń qymbattaýy halyqqa salmaq túsirip otyr.
Japonııa banki mólsherlemeni kóterý týraly sheshimin jarııalaǵannan keıin Tokıo qor bırjasynyń negizgi Nikkei 225 ındeksi ósti.
Aıta keteıik, jaqynda Japonııanyń úkimet quramynda aýys-túıis bolady.
