Japonııada parlamenttiń joǵarǵy palatasynyń saılaýy ótti

ASTANA. KAZINFORM – 20 shilde, jeksenbi kúni Japonııada parlamenttiń joǵarǵy palatasy – Keńesshiler palatasyna (Sangıın) saılaý ótti, dep habarlaıdy Anadoly.

Daýys berý qorytyndysy boıynsha premer-mınıstr Sıgerý Isıbanyń úkimeti aýysýy múmkin degen boljam bar.

Keńesshiler palatasy 248 músheden turady. Daýys sanaý nátıjesinde olardyń 125 orny qaıta bólinedi.

Premer-mınıstr Isıba Sıgerý basqaratyn Lıberal-demokratııalyq partııa (LDP) koalıtsııasy parlamenttegi kópshilikti saqtap qalý úshin kem degende 50 mandat alýy qajet.

Aıta keteıik, Kazinform aqparat agenttiginiń halyqaralyq sholýshysynyń paıymdaýynsha, bıliktegi koalıtsııa tizginnen aıyrylýy múmkin. Bul naýqanda depýtattardyń jartysy qaıta saılanady.

Kóp jaǵdaıda mundaı saılaýlar ádettegi saıası úderistiń bir bóligi sanalady, sebebi eldiń bılik qurylymyna sáıkes, negizgi jaýapkershilik tómengi palataǵa júktelgen. Alaıda bıylǵy saılaýdyń basty ıntrıgasy – 2024 jyldyń qazan aıynda ótken parlament saılaýynan keıin bıliktegi koalıtsııa – Lıberal-demokratııalyq partııa (LDP) men «Komeıto» partııasy tómengi palatada kópshilik orynǵa ıe bola almaı qalǵan.

Qazir LDP-da 191 mandat, «Komeıto» partııasynda – 24 mandat bar. Al tómengi palatada jalpy 465 oryn bar. Osylaısha, koalıtsııanyń yqpaly aıtarlyqtaı álsiregen.

Qazirgi tańda LDP men «Komeıto» koalıtsııasy joǵarǵy palatany baqylaýda ustap otyr. Alaıda NHK teleradıokorporatsııasynyń 14 shildedegi boljamyna súıensek, bul saılaýda koalıtsııa kópshilikti saqtap qala almaýy múmkin. Mundaı jaǵdaıda úkimettiń zań shyǵarý qyzmeti is júzinde toqtap qalýy yqtımal.

Alaıda Japonııadaǵy oppozıtsııa ártúrli ıdeologııany ustanatyn birneshe partııadan quralǵan. Sondyqtan olardyń myqty ári turaqty bılik koalıtsııasyn qurýy qıynǵa soǵady. Mysaly, tómengi palatadaǵy oppozıtsııalyq partııalardyń ishindegi eń iri fraktsııa – Konstıtýtsııalyq-demokratııalyq partııaǵa tıesili, onyń quramynda 148 depýtat bar. Sonymen qatar yqpaldy Demokratııalyq partııa (28 oryn), Innovatsııalar partııasy (38 oryn), solshyl popýlıstik baǵyttaǵy «Reıva Sınsengýmı» (9 oryn), kommýnıster (8 oryn) jáne basqa da shaǵyn partııalar bar.

Buǵan deıin Japonııa 2011 jyldan beri alǵashqy atom elektr stantsııasyn salýǵa daıyndalyp jatqanyn jazdyq.