Japonııada ótken jyly 300 myńnan astam oqýshy mektepke barmaǵan

ASTANA. KAZINFORM – 2023 jyly Japonııada 30 kúnnen astam mektepke barmaǵan oqýshylardyń sany 346,482-ge jetip (2022 jylmen salystyrǵanda 15.9%-ǵa kóp), jalpy oqýshylardyń 3.7%-yn qurady, dep habarlaıdy KYODO NEWS aqparat agenttigi.

Japonııanyń bilim jáne ǵylym mınıstrliginiń málimetinshe, eldegi mundaı oqýshylar sany 11 jyl qatarynan kóbeıip keledi, tarıhı rekord ornatty.

Oqýshylardyń mektepke barmaýyna eń jıi kezdesetin sebep — «motıvatsııanyń bolmaýy», ekinshi orynda — «qorqynysh pen depressııa». 

Japon bilim mınıstrliginiń taldaýynsha, ata-analardyń kóbisi balalaryn mektepke barýǵa májbúrlemeıtindigi jáne mektep tarapynan erekshe qamqorlyqty qajet etetin balalarǵa qoldaý kórsetý jetkiliksizdigi bul kórsetkishtiń ósýine basty sebep bolyp otyr.

Sonymen qatar, 2023 jyly bul elde oqýshylar arasyndaǵy qorlaý oqıǵalarynyń sany shamamen 733 000-dy qurady.