Japonııada orman órtinen 80-nen astam úı órtendi

ASTANA. KAZINFORM – Japonııadaǵy Ivate prefektýrasynyń Ofýnato qalasynda orman órtinen 80-nen astam úı órtenip, 2 myńǵa jýyq turǵyn evakýatsııalandy, dep habarlaıdy Kyodo News aqparat agenttigi.

Bul bir aptaǵa jýyq ýaqytta aımaqta bolǵan úshinshi órt. Jergilikti bıliktiń habarlaýynsha, sársenbi kúni bastalǵan órt 600 gektar jerdi sharpydy. Jalyn túni boıy sóndirildi. Beısenbi kúni tańerteń órtti áýeden sóndirýge ózin-ózi qorǵaý kúshteriniń tikushaqtary jumyldyryldy. 

Oqıǵa ornynan adamnyń kúıgen denesi de tabyldy, polıtsııa oqıǵanyń órtke qatysy bar-joǵyn anyqtap jatyr. 

Premer-mınıstrdiń keńsesinde úılestirý shtaby quryldy. Mınıstrler kabınetiniń bas hatshysy Esımasa Haıası ortalyq úkimet «qajetti qoldaý kórsetý úshin jergilikti bılikpen tyǵyz jumys isteıtinin» málimdedi. 

Ofýnatoda beısenbi kúni mektepter men balabaqshalar jabylyp, 500 úı jaryqsyz qaldy, dep habarlaıdy jergilikti bılik. Qaladaǵy temirjol jelisiniń bir bóliginde qozǵalys toqtatyldy.

Jergilikti bılik ókilderiniń habarlaýynsha, sársenbi kúni tikushaqtardy paıdalanýǵa qatty jel kedergi keltirgendikten, órtti aýyzdyqtaý jumystary jerden júrgizildi. 
Buǵan deıin, 19 aqpanda Ofýnatoda orman órti shyǵyp, negizinen seısenbi kúni tańerteń sóndirildi.

Seısenbi kúni kórshiles Rıkýzentakata qalasynda ekinshi órt shyǵyp, sársenbi kúni aýyzdyqtaldy.

Sońǵy órt birinshi orynǵa jaqyn jerde bolǵanymen, bılik ekeýiniń bir-birimen baılanysy bar-joǵyna áli senimdi emes ekenin málimdedi. 

Eske sala ketsek, buǵan deıin Kalıfornııa bıligi Los-Andjeleste qalanyń batysyndaǵy keıbir aýmaqtardy sharpyǵan orman órtine baılanysty tótenshe jaǵdaı jarııalady.