Japonııada ómirden jalǵyz ótetin qarttardyń sany artyp keledi
TOKIO. KAZINFORM – Ústimizdegi jyldyń birinshi toqsanynda Japonııada 22 myńǵa jýyq adam ómirden jalǵyz ótken. Japonııa ulttyq polıtsııa agenttiginiń habarlaýynsha, bul san jyl saıyn 68 myń adamǵa deıin artady dep boljanyp otyr. Sondaı-aq ózin-ózi oqshaýlaý men ózin-ózi qaraýsyz qaldyrý saldarynan jalǵyz ótetin adamdar sanynyń ósýi múmkin, dep jazady AZERTADJ.
«Korıtsýsı» (jalǵyz ólim) termıni Japonııada 1995 jylǵy Kobedegi jer silkinisinen keıin paıda boldy. Bul kezde kóptegen qarttar ýaqytsha baspanada turýǵa májbúr boldy. Sosyn keıbireýler ózderine qamqorlyq jasaýdan nemese basqalardan kómek alýdan bas tartyp, oqshaýlandy.
«Korıtsýsı» «eshkimge bildirmeı ólý jáne máıit belgili bir ýaqyttan keıin tabylýy kerek» degendi bildiredi. Bul jaǵdaı Japonııa halqynyń tez qartaıýyna jáne jalǵyz adamnan turatyn úı sharýashylyqtarynyń úlesi qazirgi 36 paıyzdan joǵarylaǵan saıyn jıirek bolyp jatyr.
Sarapshylardyń aıtýynsha, buǵan jady men psıhıkalyq densaýlyq problemalary sebep bolady. Egde jastaǵy adamdar kómek kórsetýden bas tartqan jaǵdaıda da úkimet qoldaý kórsetý joldaryn izdeýi kerek.
2023 jyldyń tamyzynda japon úkimeti qajetti áreketti ázirleý úshin jalǵyzilikti ólimdi zertteıtin sarapshylar tobyn qurdy.
