Japonııada «Dýtszıýan» taıfýny nóser jańbyr men laı kóshkinin týyndatyp, adamdar qaza boldy
ASTANA. KAZINFORM- «Dýtszıýan» taıfýny Japonııanyń shyǵys bóligine nóser jańbyr ákelip, sý tasqyny men laı kóshkinin týdyrdy. Sońǵy málimet boıynsha Kanagava prefektýrasynda bir áıel qaza tapqan, taǵy birneshe adam iz-túzsiz joǵalǵan, dep habarlaıdy Reuters.
Eń kúrdeli jaǵdaı Tokıo men oǵan irgeles prefektýralar ornalasqan Kanto óńirinde qalyptasty. Uzaq ýaqyt jaýǵan nóserdiń saldarynan laı kóshkini júrip, úıler men joldardy sý basty.
Kanagava prefektýrasynyń Iokosýka qalasynda laı kóshkini turǵyn úıdi basyp qaldy. Qutqarýshylar úıindi astynan 64 jastaǵy áıeldi alyp shyqqanymen, ony aman alyp qalý múmkin bolmady. Kórshiles Mıýra qalasynda laı kóshkini eki qabatty turǵyn úıdi ishinara basyp qalǵan. Qazir onda izdeý-qutqarý jumystary jalǵasyp jatyr.
Kyodo agenttiginiń málimetinshe, laı kóshkininen iz-túzsiz joǵalǵandar sany tórt adamǵa jetti.
Tabıǵı apat Tıba prefektýrasyna da aıtarlyqtaı zııan keltirdi. Onda turǵyn úıler men kóshelerdi sý basty. Al Sodegaýra qalasynda jolǵa túsken topyraq úıindisimen kóligi soqtyǵysqan áıel jaraqat aldy.
Jekelegen aýdandarda jaýyn-shashyn mólsheri rekordtyq deńgeıge jetti. Idzý-Osıma aralynda táýlik ishinde 670 mm-den astam jańbyr jaýdy. Tıba prefektýrasynyń birqatar qalasynda táýliktik jaýyn-shashyn mólsheri boıynsha tarıhı rekord jańardy. Kımıtsýda 377,5 mm, Fýnabasıde 341,5 mm, Itıharada 328 mm jaýyn-shashyn tústi.
Japonııanyń meteorologııalyq agenttigi laı kóshkini, sý tasqyny, ózenderdiń arnasynan shyǵýy, qatty jel jáne bıik tolqyn qaýpi týraly eskertý jarııalady.
Buǵan deıin Idzý araldaryndaǵy Osıma qalasynda laı kóshkini qaýpine baılanysty eskertýdiń eń joǵary, besinshi deńgeıi jarııalanǵan bolatyn. Sınoptıkter sondaı-aq qysqa ýaqytta sý tasqynyn týdyrýy múmkin qatty jaýyn-shashynnyń syzyqtyq aımaqtary qalyptasýy yqtımal ekenin eskertti.
Meteorologtardyń málimetinshe, 21 qyrkúıek keshke taıfýnnyń ortalyǵy Tıba prefektýrasynyń jaǵalaýynan ońtústik-shyǵysqa qaraı ornalasyp, soltústik-shyǵys baǵytta jyljyǵan. Taıfýn ortalyǵyndaǵy qysym shamamen 960 gektopaskal boldy. Jeldiń maksımaldy jyldamdyǵy 40 m/s-qa, ekpini 55 m/s-qa jetti.
Qolaısyz aýa raıy kólik qatynasyna da aıtarlyqtaı áser etti. Japan Airlines áýe kompanııasy ishki baǵyttar boıynsha shamamen 120 reısti, All Nippon Airways shamamen 140 reısti toqtatty. Tıba men Ibarakı prefektýralarynda jáne Tokıonyń batys bóliginde keıbir temirjol jelileriniń qozǵalysy tolyq nemese ishinara toqtatyldy.
Eske salaıyq, buǵan deıin Japonııaǵa taǵy da taıfýn jaqyndap kele jatqany týraly jazdyq.
