Japonııada myńdaǵan otbasy qalyń jaýǵan qardan úılerinen shyǵa almaı qaldy
ASTANA. QazAqparat - Japonııada senbige qaraǵan túni birneshe myńdaǵan otbasy qar qursaýynyń saldarynan óz úılerine qamalyp qaldy. Bul týraly dúısenbi kúni Japonııanyń BAQ habarlady.
Sıdzýoka prefektýrasyndaǵy Oıama kentinde óz úılerinde 3000 adam qamalyp qalǵan. Kómekke shaqyrylǵan qorǵanys bólimderiniń kúshimen joldy tazartý jumystary júrgizilýde. Alaıda kentke qazir tek arnaıy kólik qana jete alady. 1200-ge jýyq adam ıAmanası prefektýrasyndaǵy Haıakava kentinen shyǵa almaı qalǵan.
«Sankeı» gazetiniń habarlaýynsha, Gýmma prefektýrasynda Nammoký taýly kentinde turyp jatqan 1130 otbasynyń syrtpen baılanysy úzilgen. Aýylda senbiden beri elektr jaryǵy da joq. Tokıo megapolısiniń quramyna enetin eki eldi mekende shamamen 1300 adam qar qursaýynyń saldarynan úılerinen shyǵa almaı qalǵan. Jeksenbi kúni olar arnaıy qyzmetten kómek suraǵan. Joldy qardan tazartý jumystary júrgizilip jatyr.
Qardyń kóp túsýinen Japonııanyń tas joldarynda, atap aıtqanda, Nagano prefektýrasynda 900 avtokólik jolda turyp qalǵan.
Osy demalys kúnderi Japonııaǵa taǵy da qar qalyń tústi. Tokıoda jaýǵan qardyń qalyńdyǵy - 27 santımetr, ıAmanası prefektýrasynyń basty qalasy - el astanasynan bastysqa qaraı 130 shaqyrym jerde ornalasqan Kofýde - 114 santımetr, Tokıodan soltústik-shyǵysqa qaraı ornalasqan Fýkýsımoda - 36 santımetr, Sendaıda - 29 santımetr qar jaýǵan. Senbi kúni mektepterde sabaq bolǵan joq.
«Iomıýrı» gazetiniń málimetteri boıynsha, Japonııanyń 29 prefektýrasynda qardyń qalyń túsýinen 17 adam mert bolǵan, 1550 adam túrli deńgeıdegi jaraqat alǵan.
Bul apta ishinde qar ekinshi ret kóp jaýyp otyr. Ótken demalys kúnderi Japonııa astanasynyń aımaǵynda qar kóp jaýyp, onyń saldarynan 13 adam qurban bolǵan. Zardap shekkender sany 1,7 myńnan asty. Keıbir aýdandardaǵy qar qalyńdyǵynyń bıiktigi sońǵy 45 jyldaǵy rekordtyq kórsetkishke - 27 santımetrge deıin jetken.
