Japonııada maımyl shesheginen birinshi adam qaıtys boldy
Japonııada Tokıoǵa jaqyn mańdaǵy Saıtama proefektýrasynda turǵan er adam Mpox dertinen qaza tapty. Ol elde osy aýrýdan qaıtys bolǵan alǵashqy adam retinde tirkeldi. Bul týraly Japonııa densaýlyq saqtaý mınıstrligi málim etti, dep habarlaıdy Kazinform Sınhýa agenttigine silteme jasap.
Mekeme deregi boıynsha, er adamda vırýs juqtyrý saldarynan ımmýn tapshylyǵy bolǵan. Oǵan qyrkúıekte jergilikti aýrýhanada Mpox dıagnozy qoıylyp, eki aıdan keıin qaıtys boldy. Naýqas shetelge shyqpaǵan.
Mpox vırýsyn juqtyrǵan alǵashqy adam Japonııada 2022 jyldyń shildesinde tirkelgen bolatyn. Mınıstrliktiń aıtýynsha, 2023 jylǵy 3 jeltoqsandaǵy jaǵdaı boıynsha elde osy aýrýǵa shaldyqqan 227 adam anyqtalǵan.
Syrqattan adamnyń dene qyzýy kóterilip, basy aýyryp, denesi bórtip ketedi, aýyr belgileri eki-tórt aptaǵa deıin sozylady.
Bıyl mamyrda «maımyl sheshegi» degen atpen tanylǵan Mpox aýrýyn juqtyrǵan adamdar sany azaıǵan bolatyn. Dúnıejúzilik densaýlyq saqtaý uıymy sondyqtan bul vırýstyń taralýy tótenshe jaǵdaıǵa jatpaıdy dep málimdedi.
