Japonııada «Lan» taıfýnynan 49 adam zardap shegip, 90 myń adam jaryqsyz qaldy

TOKIO. QazAqparat – Japonııanyń eń úlken jáne halyq sany tyǵyz ornalasqan araly Honsıýde «Lan» taıfýnynan 49 adam zardap shekti, dep habarlaıdy QazAqparat Kyodo-ǵa silteme jasap.

Japonııanyń ortalyq bóliginde qatty nóserden Tokıo men Hakata stansalarynyń arasyndaǵy júrdek poıyz qozǵalysy toqtatyldy. Nagoıa men Okaıama stansalary arasyndaǵy qozǵalys seısenbi kúni toqtady.

Órt pen tabıǵı apatpen kúres agenttiginiń málimetinshe, eldiń segiz prefektýrasynda aýa raıy qolaısyzdyǵynan 49 adam zardap shekti.

Eske salaıyq, seısenbi kúni tańerteń Japonııanyń batysyndaǵy Kıı túbegine «Lan» taıfýny keldi. Tottorıde joldar jabylyp, eki kópirdiń qulaýynan 1200 turǵyn «tuzaqta» qalyp qoıdy.

Meteorologııalyq agenttik málimetinshe, epıtsentrinde atmosferalyq qysym 990 gektopaskalǵa jetip, jel jyldamdyǵy saǵatyna 108 shaqyrymǵa jetken. 900 áýe reısi toqtatyldy, dep habarlaıdy Reuters.

Japonııanyń ortalyǵyndaǵy keıbir jerlerde 24 saǵatta 585 mm jaýyn-shashyn jaýǵan. 11 prefektýra turǵyndary úshin ýaqytsha baspana jasaldy. Kommýnaldyq qyzmet málimetinshe, eldiń ortalyǵy men batys aýdandarynda 90 myń adam jaryqsyz qalǵan.

Ótken aptada Japonııanyń ońtústik-batysynan «Hanýn» taıfýny ótken bolatyn.