Japonııada kúshti jer silkinisinen keıin tsýnamı týraly eskertý jarııalandy
ASTANA. KAZINFORM — Dúısenbi kúni Japonııanyń soltústik-shyǵysy men soltústiginde aldyn ala esep boıynsha magnıtýdasy 7,5 kúshti jer silkinisi bolyp, sodan keıin tsýnamı týraly eskertý jarııalandy, dep habarlaıdy Kyodo.
Jer silkinisiniń magnıtýdasy bastapqyda 7,4 dep baǵalanǵan, biraq keıinirek joǵary qaraı qaıta qaraldy.
Qurban bolǵandar men jaraqat alǵandar týraly aqparat túsken joq.
Japonııanyń meteorologııalyq agenttiginiń málimetinshe, jer silkinisiniń oshaǵy 10 shaqyrym tereńdikte ornalasqan.
Agenttik Hokkaıdo, Aomorı jáne Ivate prefektýralarynyń Tynyq muhıty jaǵalaýlary úshin tsýnamı týraly eskertý jarııalap, jaqyn arada bıiktigi 3 metrge jetetin tsýnamı bolady dep boljady.
Ivate prefektýrasyndaǵy Kýdzı portynda bıiktigi 80 santımetr tsýnamı tirkeldi.
Aomorı men Mııagı prefektýralaryndaǵy Hıgasıdorı jáne Onagava atom elektr stantsııalarynyń, sondaı-aq Fýkýsıma prefektýrasyndaǵy Fýkýsıma-Daııchı jáne Daını AES operatorlarynyń málimetinshe, eshqandaı aýytqýlar tirkelgen joq.
Tokıo men Sın-Aomorı stantsııalary arasyndaǵy Tohoku Shinkansen júrdek poıyzynyń qatynasy toqtatyldy.
Premer-mınıstr Sanae Takaıtı tsýnamı týraly eskertýler men keńester berilgen aımaqtardyń turǵyndaryn qaýipsiz jerge kóshýge shaqyrdy.
Eske salsaq, ótken aptada Kaspıı teńizinde magnıtýdasy 4,6 baldyq jer silkinisi boldy.
