Japonııada krýızdik laınerde koronavırýs juqtyrǵandar sany 175 adamǵa jetti
TOKIO. QazAqparat – Japonııada karantın jarııalanǵan Diamond Princess krýızdik laınerinde taǵy 39 adamnyń testi koronavırýsqa oń nátıje berdi. Іndet juqtyrǵandar sany 175 adamǵa jetti. Olardyń arasynda karantındik ınspektor da bar, dep habarlaıdy QazAqparat Japan Today-ge silteme jasap.
Diamond Princess laıneri 3 aqpan kúni Iokogamýǵa kelgennen keıin eki aptaǵa karantınge ornalastyryldy. Jolaýshylardyń birinen koronavırýs tabyldy.
Keme bortynda 3700 adam bolǵan. Diamond Princess álemdegi iri krýızdik laınerlerdiń biri Princess Cruise Lines-ge tıesili.
Keıbir BAQ-tyń málimdeýinshe, úkimet egde jastaǵy adamdar men sozylmaly aýrýy bar adamdarǵa karantın merzimi aıaqtalǵanǵa deıin, 19 aqpanǵa deıin jaǵaǵa shyǵýǵa ruqsat berý máselesin qarady, biraq olardy qaıda jiberý kerektigin anyqtaý úshin ýaqyt qajet.
Japan Times aǵylshyn tildi gazetiniń deregi boıynsha, krýızdik kemedegi jolaýshylardyń 80%-y 60 jastan asqandar, sonyń ishinde 215 adam 80 jastan asqan jáne 11 adam 90-nan asqan.
Kyodo agenttigi densaýlyq saqtaý mınıstrligine silteme jasap habarlaǵandaı, 39 adamnyń 10-y ekıpaj múshesi. Aýrý juqtyrǵandar arasynda 10 Japonııa azamaty, qalǵandary 11 eldiń, sonyń ishinde AQSh pen Qytaı azamattary. Tórteýi aýyr halde jatyr.
Eske salsaq, buǵan deıin Japonııanyń krýız laınerinde koronavırýs juqtyrǵandar sany 70-ke jetkeni týraly habarlaǵan bolatynbyz .
