Japonııada krýız laıneri ekıpajynyń 34 múshesi koronavırýs juqtyrdy
NUR-SULTAN. QazAqparat - Costa Atlantica krýız kemesiniń ekıpaj músheleriniń arasynda koronavırýs ınfektsııasyn 30-dan astam adamnyń juqtyrǵany anyqtaldy.
Bul týraly QR Prezıdenti janyndaǵy Tótenshe jaǵdaı rejımin qamtamasyz etý jónindegi Memlekettik komıssııanyń Jedel shtaby habarlady.
Jedel shtab taratqan málimetterge qaraǵanda, 25 naýryzda Costa Atlantica laıneri profılaktıka jáne jóndeý jumystaryn júrgizý úshin jolaýshylarsyz Nagasakı portyna jetkizilgen. Laıner barlyq jumystar aıaqtalǵannan keıin sáýir aıynyń sońynda porttan ketýi kerek edi. Alaıda, sáýir aıynyń ortasynda ekıpaj músheleriniń birinen koronavırýs ınfektsııasy tabyldy.
KVI testin tapsyrǵan 57 komanda múshesiniń 34-iniń koronavırýsty juqtyrǵany rastaldy. Kemede barlyǵy 623 adam bar.
Japonııada COVID-19 anyqtalǵan adamdar sany 12 myń 255 adamdy qurady, onyń ishinde Diamond Princess krýız kemesinde vırýsty juqtyrǵan 712 adam bar. 296 adam kóz jumdy, 236 adamnyń jaǵdaıy aýyr dep baǵalanyp otyr. 2001 adam saýyǵyp shyqqan.
Foto: kyodonews.net
