Japonııada QR Ulttyq kúnine oraı Qazaqstannyń týy kóterildi
ASTANA. KAZINFORM — Qazaqstan Respýblıkasynyń saýda jáne ıntegratsııa mınıstri Arman Shaqqalıev bastaǵan qazaqstandyq delegatsııa EXPO 2025 Osaka dúnıejúzilik kórmesinde Qazaqstannyń Ulttyq kúni aıasyndaǵy is-sharalarǵa qatysý úshin Japonııaǵa resmı saparmen bardy. Bul týraly vedomstvonyń baspasóz qyzmeti málim etti.
EXPO National Day Hall (EXPO Ulttyq kúni zaly) alańynda mınıstr A. Shaqqalıev pen Osaka EXPO 2025 qaýymdastyǵy ókilderiniń qatysýymen Qazaqstan Respýblıkasynyń týyn kóterý rásimi ótkizildi.
Mınıstr óz sózinde Japonııa úkimetine jáne kórmeni uıymdastyrý komıtetine osy bedeldi halyqaralyq sharany joǵary deńgeıde daıyndap, ótkizgeni úshin shyn júrekten alǵysyn bildirip, búgingi kúnniń elimiz úshin mańyzdylyǵyn atap ótti.
— Búgingi shara qazaqtyń uly oıshyly Abaı Qunanbaıulynyń 180 jyldyǵyna oraılastyrylǵan. Bul óńirlerdiń geografııalyq qashyqtyǵyna qaramastan, rýhymyzdyń jaqyn ekendigin bildiredi, sebebi bizdi dástúrler men aǵa býynǵa degen qurmet, bilim men eńbekke degen joǵary mán biriktiredi, — dedi A. Shaqqalıev is-sharanyń resmı ashylý saltanatynda.
Sondaı-aq mınıstr 1991 jyly dıplomatııalyq qatynastar ornaǵannan beri eki el arasyndaǵy saýda, ınvestıtsııa, ǵylym, bilim, ekologııa jáne tehnologııa salalarynda turaqty yntymaqtastyq damyp kele jatqanyn atap ótti.
Óz kezeginde Japonııanyń ekonomıka, saýda jáne ónerkásip vıtse-mınıstri Akıesı Kato Osakadaǵy EXPO-da ótken elimizdiń Ulttyq kúnimen qazaqstandyq delegatsııany quttyqtap, óz sózinde mádenı almasýdyń ózara túsinistikti, yntymaqtastyqty jáne eki el arasyndaǵy ekijaqty baılanystardy damytýdaǵy mańyzdylyǵyn atap ótti.
Dúnıejúzilik kórme qonaqtary úshin Qazaqstannyń Ulttyq kúnin merekeleý sheńberinde EXPO aýmaǵynda qazaqstandyq balýan, tórt dúrkin álem rekordshysy Sergeı Tsyrýlnıkovtyń, ulttyq kıimdegi ártister men batyrlardyń qatysýymen aýqymdy sherý uıymdastyryldy.
Sharanyń kórkin keshkisin Expo Hall Shining Hat sahnasynda qazaqstandyq óner sheberleriniń qatysýymen ótken kontsert ashty. Aýqymdy merekelik baǵdarlama shamamen 3 myń kórermendi jınady. Kontsert qazaq mádenıetiniń baılyǵyn pash etken Dına Nurpeıisova atyndaǵy akademııalyq halyq aspaptary orkestriniń áýenderimen, Sarmad jáne Art Dombyra ansamblderiniń etno jáne folklorlyq yrǵaqtarymen, opera solısteri Zarına Altynbaeva men Altynbek Ábildanyń keremet daýystarymen, sondaı-aq «Birlik» ansambliniń jigerli bı qoıylymdarymen jáne Qazaqstannyń kóptegen basqa da talantty ártisteriniń ónerimen este qaldy. Keshte Q. Saǵyrbaıulynyń, N. Tilendıevtiń, Q. Ahmedııarovtyń, L. Hamıdıdiń, E. Brýsılovskııdiń jáne halyq súıispenshiligine bólengen ózge de sazgerlerdiń týyndylary kórermenderdiń ystyq yqylasyna bólendi.
Sonymen qatar shara barysynda kórme aýmaǵynda Astana qalasy men Ulytaý óńiriniń ınvestıtsııalyq jáne týrıstik áleýetin kórsetetin stendter qoıyldy.
Qazaqstandyq pavılon kelýshiler arasynda óte tanymal ekenin aıta ketken jón. Oǵan kelgen qonaqtar sany 900 myńǵa jetti.
Esterińizge salyp ótsek, bıyl Japonııanyń Osaka qalasynda EXPO 2025 dúnıejúzilik kórmesi bastaldy. Uıymdastyrýshylardyń deregi boıynsha aýqymdy is-sharaǵa 160 el men 9 halyqaralyq uıym qatysýda, 28 mln-nan astam kelýshi keledi degen boljam bar. Kórme 2025 jyldyń 13 sáýiri men 13 qazany aralyǵynda ótedi. Ótkizý orny retinde jasandy ıÝmeshıma araly tańdaldy. EXPO-nyń basty taqyryby — «Bizdiń ómirimiz úshin bolashaq qoǵamyn qurý», ol úsh baǵyt arqyly ashylady: «Ómirdi qutqarý», «Múmkindikterdi keńeıtý» jáne «Ómirdi biriktirý».