Japonııada koronavırýstyń taǵy bir jańa shtammy anyqtaldy
TOKIO. KYODO-QazAqparat – Japonııada koronavırýstyń taǵy bir jańa shtammy anyqtaldy, dep habarlaıdy QazAqparat Kyodo aqparattyq agenttigine silteme jasap.
Jeksenbi kúni resmı derekkózder Tokıonyń Haneda áýejaıyna Brazılııadan ushyp kelgen tórt adamnyń koronavırýstyń jańa shtammyn juqtyrǵanyn málimdedi. Japonııanyń ınfektsııalyq aýrýlar jónindegi Ulttyq ınstıtýtynyń qazirgi kezde vırýstyń jańa nusqasynyń buǵan deıingi vırýsqa qaraǵanda jyldam taralatyndyǵy nemese kúrdeli belgileriniń bar-joǵy týraly dáleli joq. Instıtýt basshysy Takadja Vakıta jańa nusqanyń (shtamm) Ulybrıtanııa jáne Ońtústik Afrıkada taralyp júrgen vırýs túrine uqsas ekenin qosyp ótti.
Koronavırýstyń budan da qaýipti nusqalarynyń eki elde anyqtalýyna qatysty alańdaýshylyǵyn bildirgen Japonııa úkimeti sheteldik rezıdent emes azamattardyń elge kirýine tyıym saldy.
Japonııanyń densaýlyq saqtaý mınıstrligi tórt jolaýshynyń Haneda áýejaıyna 2 qańtar kúni Brazılııadan kelgenin habarlady. Áýejaıdaǵy karantınnen keıin olardyń koronavırýstyq ınfektsııaǵa tapsyrǵan testi oń bolyp shyqqan.
Olardyń ishinde 40 jastaǵy er adam tynys alýy nasharlaǵanyna, 30 jastaǵy áıel tamaǵy men basynyń aýyrǵanyna shaǵymdandy, al jasóspirim balanyń dene qyzýy kóterilgen. Tórtinshisi, jasóspirim qyz balada aýrýdyń eshqandaı belgileri bolǵan joq.
Qazirgi kezde Japonııada koronavırýs ınfektsııasyn juqtyrýdyń 6 myńnan astam jańa oqıǵasy tirkeldi. Aýrý juqtyrǵandardyń jalpy sany 289 myń adamnan asqan. Elde qaýipti vırýstyń taralýynan 4 myńnan astam adam qaıtys boldy.
