Japonııada qonaqúıde qyzmet etetin robottardyń jartysy «jumystan shyǵaryldy»
ASTANA. QazAqparat - Japonııadaǵy Henn na Hotel qonaqúıiniń ıeleri robot qyzmetkerleriniń jartysyn «jumystan shyǵardy». Bul týraly The Wall Street Journal basylymy jazdy, dep habarlaıdy QazAqparat.
2015 jyly Japonııanyń Sasebo aralynda ashylǵan qonaqúı Gınnestiń rekordtar kitabyna robottar qyzmet etetin álemdegi alǵashqy otel retinde engizilgen bolatyn.
«Qazirge deıin qonaqúı 243 robottyń jartysyn jumysqa jaramsyz dep tanydy. Óıtkeni olar qonaqtarǵa qyzmet etýde kóbirek qıyndyq týǵyzǵan», - dep jazady basylym. Qonaqúıdiń bas menedjeri Takeosı Oı tehnologııa ataýly tórt jylda eskirip úlgeretinin aıtady. Onyń sózine qaraǵanda, qultemirlerdi jańasyna almastyrý tym qymbatqa túsetin kórinedi.
Robottar qonaqúı turǵyndaryna kádimgideı qıyndyq týdyrǵan. Máselen, bólmedegi robot uıyqtap jatqan adamnyń qorylyn túsinbeı, «Sizge qandaı kómek qajet?» dep oıata beretin bolǵan. Al otelge ýaqytsha keletin qonaq robotty qalaı sóndirýdi de bilmeıdi.
Temir qyzmetkerlerge taǵylatyn syn kóp. Qonaqúıde 100-den astam bólme bolsa, sonyń 20-syna ǵana robottar qonaqtardyń qol júgin apara alady, olar tek tegis jerde ǵana qozǵalyp, jańbyrdyń sýy tıse buzylyp qalady.
«Olar óte jaı júredi, esesine yzyńdap mazańdy alady. Eki robot kezikse, bir-birin aınalyp ótýge «mıy» jetpeıdi», - dep shaǵymdanady otel qonaqtarynyń biri.
