Japonııada kompanııalardyń bankrotqa ushyraýy 12 jyldaǵy eń joǵary deńgeıge jetti
ASTANA. KAZINFORM – Japonııada 2026 jyldyń birinshi jartyjyldyǵynda korporatıvtik bankrottyq sany sońǵy 12 jylda alǵash ret 5 myńnan asty, dep habarlaıdy Kyodo News.
Tokyo Shoko Research zertteý kompanııasynyń málimetinshe, 2026 jylǵy qańtar-maýsym aralyǵynda qaryzy keminde 10 mln ıen (shamamen 62 myń dollar) bolatyn 5 346 kompanııa bankrot dep tanylǵan.
Bul ótken jyldyń sáıkes kezeńimen salystyrǵanda 7,1%-ǵa kóp. Sońǵy ret mundaı kórsetkish 12 jyl buryn tirkelgen.
Sarapshylardyń aıtýynsha, ıen baǵamynyń álsireýi ınflıatsııany jedeldetip, ásirese shaǵyn jáne orta bızneske aıtarlyqtaı áser etken.
Budan bólek, jumys kúshiniń sozylmaly tapshylyǵy da jaǵdaıdy qıyndatyp otyr. Tokyo Shoko Research mamandary kúzde bankrottyq sanynyń ósý qarqyny kúsheıýi múmkin ekenin eskertedi.
Derekterge sáıkes, bankrot bolǵan kompanııalardyń shamamen 90%-y – qyzmetkerler sany 10 adamnan az kásiporyndar. Al jaǵdaılardyń 80%-ǵa jýyǵy mindettemeleri 100 mln ıennen aspaıtyn kompanııalarǵa tıesili.
Salalar boıynsha eń kóp bankrottyq qyzmet kórsetý sektorynda tirkeldi – 1 819 jaǵdaı (+7,2%). Ekinshi orynda qurylys salasy tur, onda 1 026 kompanııa bankrotqa ushyraǵan.
Aıta keteıik, Japon ıenasy 40 jyldaǵy eń tómengi deńgeıge jaqyndady.
