Japonııada qoǵamnan oqshaýlanyp, úıinde kóz jumǵan jalǵyzbasty turǵyndar sany kóbeıdi

ASTANA. KAZINFORM – Japonııa bıligi jarııalaǵan sońǵy derekterge sáıkes, 2024 jyly elde 76 myń jalǵyzbasty turǵyn óz úıinde ómirden ozǵan. Olardyń ishinde 21 myńnan kóbirek adamnyń máıiti segiz kúnnen keıin ǵana baıqalyp, kýdokýsı  ıaǵnı, «eleýsiz ólim» retinde tirkelgen.

Lianhe Zaobao basylymynyń habarlaýynsha, halyqtyń jyldam qartaıýyna baılanysty Japonııa úkimeti ótken jyldyń sáýirinde «Jalǵyzdyq pen áleýmettik oqshaýlanýǵa qarsy kúres týraly» arnaıy zań qabyldaǵan. Atalǵan statıstıka, osy zańnyń aıasynda eldegi jalǵyzbasty azamattardyń óz úıinde ońasha jaǵdaıda kóz jumý faktilerine arnalǵan alǵashqy jyldyq esep bolyp otyr.

Resmı anyqtama boıynsha, ómirden ótken sátinde marqumnyń qasynda jan balasy bolmaı, máıiti segiz kún nemese odan da kóp ýaqyttan keıin tabylsa, kýdokýsı dep esepteledi. Bul jaǵdaı kóbine marqumnyń kózi tirisinde áleýmettik oqshaýlanýda bolǵanyn bildiredi.

Statıstıkaǵa sáıkes, oqshaý jaǵdaıda ómirden ozǵan 6945 adamnyń máıiti bir aıdan keıin ǵana baıqalǵan. Al 253 adamnyń jan tapsyrǵany bir jyldan keıin anyqtalǵan. Bul derekter keı azamattardyń qoǵamnan múldem qol úzip qalǵanyn kórsetedi.

Japonııa Mınıstrler Kabınetiniń saraptamasy boıynsha, elde jalǵyzbasty turǵyndardyń sany ósip keledi. Soǵan oraı, jalǵyzdyq pen áleýmettik oqshaýlaný qaýpine tap bolatyn azamattardyń qatary kóbeıe bermek.

Buǵan deıin Túrkııada jasy 50-den asqan azamattar arasynda ajyrasý jaǵdaılarynyń kóbeıgenin jazǵan edik.